Wan jngoh ka kynhun ki Naga ïa ka KHADC ban sngewthuh halor ki jingïada ïa ka hok ki trai ri

By Mawphor Editor On Jun 25, 2023

Shillong, Jylliew 24 : Ka Kynhun ki laingut ki riew shemphang na Nagaland ha ka sngi Thohdieng ki la wan ban jngoh ïa ka Khasi Hills Autonomous District Council (KHADC) ban peit bad shemphang ïa ki rukom treikam ka Council ha ka jylla na bynta ban ai jingïada ïa ka hok ki riewlum trai muluk ha kaba ïadei bad ka khyndew ka shyiap.
Kane ka kynhun ba lai ngut ki la ïohlad ban ïakynduh ruh bad ki dkhot jong ka Executive Committee ka KHADC ba kynthup naduh u CEM ka Council u Bah Pynïaid Sing Syiem bad kiwei pat ki EM.
Na ka liang u Executive Member ka Council u Bah Teiborlang Pathaw ula ïalam ruh ïa ka kynhun ban jngoh ïa ka Building ka Council kaba treikam ka Executive, Lagislative bad Judiciary.
Haba ïakren bad ki nongthoh khubor, ka Dr Anungla Imdong Phom, kaba dei ka Director ka Directorate of Under Developed Areas (DUDA) ka Sorkar Nagaland ula ong ba kane ka kynhun haba wan rung sha Shillong ka la ïohi ïa ka signboard jong ka KHADC bad kala shonkhmat bad rai ban iuhkjat hapoh ka Council.
“Ngi la ïoh jingtip ba kane ka Council ka dei kaba ïada ïa ka khyndew ka shyiap, ka riti ka dustur jong ki paid riewlum trai ri. Ta ka daw ngi la wan hangne. Kum ki Naga, nga ïalade nga dei u riewlum, ngi dei ban ïada ïa ka jaidbynriew lajong bad ruh ngi dei ban ïada ïa ka riti ka dustur bad kane ka dei kaba ka KHADC ka la leh” ka la ong.
Haba pynpaw ba ka KHADC ka dei ka nuksa ïa kwei pat ki Jylla ka thaiñ Shatei Lam Mihngi, ka Dr Anungla ka la pynpaw ïa ka jingkmen ban tip ba ki briew na kylleng ki bynta ka ri kum na Ladakh ki la wan sha nongbah Shillong ban wad jingtip ïa ka rukom treikam jong ka KHADC.
Haba kylli, ka Director ka la ong ba ka DUDA ka kwah ban wad jingtip ba bniah halor ka KHADC namar ka Sorkar Pdeng ka don jingthmu ban ai Autonomous District Council ïa ki katto katne ki bynta jong ka Nagaland.
“Ki Executive Member ki la bha palat ban ai ha ngi ïa ki kot ïa kiba ngi lah ban wad bniah bad kaei kaba bha tam ïa ki briew jong ngi, ngin pyrshang ban pyntreikam”, ka la ong.