Wan ïuh kjat u myntri khynnah ka sorkar pdeng ïa ka Ri Bhoi District kum ka Aspirational District

Nongpoh, Risaw 03: U Myntri khynnah ka sorkar pdeng, u Devusinh Chauhan na ka ministry ka tnad Communication jong ka sorkar pdeng mynta ka sngi u la wan ban ïuh kjat ha Ri Bhoi District na ka bynta ban peit ban khmih halor ki kam pynroi ba la pyntreikam ha kane ka District kaba la shah jied kum kata ka Aspirational District.
Ha kane ka jingwan iuh kjat une u myntri khynnah ka sorkar pdeng ha Ri Bhoi District la pynlong ïa ka jingïakynduh lang jong baroh ki ophisar sorkar na ki tnad treikam bapher bapher ka District na ka bynta ban ïa khmih bniah (Review) halor ki kam pynroi ba la pyntreikam ha kane ka District kum kata ka Aspirational District.
Ïa une u myntri khynnah ka sorkar pdeng la pdiang burom da u Deputy Commissioner ka Ri Bhoi, u Arpit Upadhaya ryngkat ka jingdon lang u Superintendent of Police ka Ri Bhoi, u Giri Prasad, u Sanjeev Sharma, Deputy Director General u myntri khynnah, u Dr. Gaurav Kumar Saini, Assistant Director General u myntri khynnah lem bad ka jingdon lang kiwei kiwei ki ophisar sorkar na kane ka District.
La pynlong ruh ïa ka jingïakynduh lang une u myntri khynnah ka sorkar pdeng bad ki ophisar bapher bapher ka District ha Conference Hall ka ophis u Deputy Commissioner bad ha kane ka jingïakynduh la ïa tai shibun halor ki kam pynroi ba kum ki ophisar ki la pynshai sha une u myntri khynnah halor ka jingpyntreikam ïa ki kam pynroi hapoh kane ka District kaba la shah jied kum kata ka Aspirational District.
Haba ai kren ha kane ka jingïakynduh lang bad ki ophisar ka District ha Conference Hall ka ophis u Deputy Commissioner ka Ri Bhoi, u Myntri khynnah ka sorkar pdeng, u Devusinh Chauhan, u la pynpaw halor shibun ki jingangnud jong ka sorkar pdeng ba la ïalam da u Myntri Rangbah, u Narendra Modi ba kaned ka sorkar ka thrang ban wah rah shibun ki jingkylla bad ruh ban kyntiew ha baroh ki liang ba ka Ri Bhoi District ka long kawei na ka District kaba la shah jied kum kata ka Aspirational District ba ki prokram bapher bapher la pyntreikam ban wan rah ïa ka jingkylla ha ka liang ka bha ka miat bad ka roi ka par ki paidbah ha kane ka District.
U la ïathuh ruh ba ki don ki prokram bapher bapher ba la wan rah da u Myntri rangbah ka ri, u Narendra Modi da ka jingthmu ban ai ki jingmyntoi bapher bapher lyngba ki C&RD Block kaba long ruh ka jingkyntiew ïa ka ioh ka kot bad ka bha ka miat jong ki nongshong shnong.
Kum u myntri khynnah ka sorkar pdeng, u Chauhan u la kyrpad ruh sha baroh ki tnad sorkar kane ka District bad ka jylla hi baroh kawei ba ki dei ban trei shitom bad ban pyndonkam hok ïa ki kam pynroi ba la wan rah da ka sorkar pdeng khnang ba kane ka dong bad ka thaiñ hapoh ka jylla kin dang kiew shaphrang ha baroh ki bynta jong ka longbriew ka man briew, u la bynrap.
Lyngba jong kane ka sngi, une u myntri khynnah ka sorkar pdeng, u Chauhan u la leit ruh ban jurip ïa ka Civil Hospital in Nongpoh, ka Health and Wellness Centre, Umsawnongkharai, ka Anganwadi Centre, bad ka Integrated Village Cooperative Society (IVCS) ha ka Shnong Umdihar, ha kaba ka jingthmu kane ka jingleit jurip ka long ban dang kham shim khia ban kyntiew kyrpang ïa kane ka district kum kata ka Aspirational District.