Wan ïuh kjat u Myntri Khynnah ka sorkar pdeng ha Ri Bhoi halor ki kam pynroi ka Aspirational District

Nongpoh, Naitung 13: U myntri khynnah ka sorkar pdeng ba dei peit ïa ka tnad Heavy Industries and Power, u Krishan Pal Gurjar mynta ka sngi u la wan ban iuh kjat ha Ri Bhoi District na ka bynta ban lum jingtip halor ki kam pynroi ba la pyntreikam ha kane ka District kaba la shah jied kum kawei na ka ‘Aspirational District’ napdeng ki 115 tylli ki Aspirational District ha ka ri India.
Ha kane ka jingwan iuh kjat une u Myntri Khynnah ka sorkar pdeng ha Ri Bhoi, la pynlong ruh ïa ka jingïakynduh lang jong baroh ki heh ophisar na ki tnad treikam bapher bapher ka sorkar ha Ri Bhoi bad kynthup ruh ki nongmihkhmat na ka NEEPCO bad na ka tnad MeECL namar ba u dei u myntri khynnah uba peit ruh ïa ka tnad bording hapoh ka ri India.
Ïa kane ka jingïakynduh lang la pynlong ha Conference Hall ka ophis u Deputy Commissioner ka Ri Bhoid ha Nongpoh bad ki ophisar na ki tnad treikam bapher bapher ki la pynpaw markhmat (Presentatoin of reports) ïa ki mat treikam jong ki ophis jongki ba ki pyntreikam ha Ri Bhoi katkum ka thong jong ka Aspirational District.
Ha kane kajuh ka sngi hadien ba la pynlong ïa ka jingïakynduh lang, une u myntri khynnah ka sorkar pdeng u la leit ruh ban jurip ïa ka Aganwadi Centre ha Umdihar bad kumjuh ruh ïa ka Health and Wellness Centre kaba don ha ka shnong Umsawnongkharai.
Haba kren bad ki Nongthoh Khubor hadien kane ka jingïakynduh lang jong u ïa ki ophisar sorkar, u Myntri khynnah ka sorkar pdeng, u Krishan Pal Gurjar u la pynpaw ka jingkmen ban ioh ban ïa kynduh lang bad ki ophisar sorkar na kane ka district kiba la pynpaw halor ki mat treikam jong ki ban kynjoh sha ka thong jong ka Aspirational District bad dei lyngba kajingtrei shitom jongki, ba kane ka District ka la dang kiew kyrdan ha kaba ïa dei bad kane ka jingpyntreikam ïa ki kam pynroi (Indicators) katkum ka thong jong ka Aspirational District, u la ong.
U la ïathuh ruh ba u ha u snem 2016 katum ka UNDP Ranking, ki don haduh 115 tylli ki district hapoh ka ri India kiba dang sahdien bha ha ki kam pynroi bad dei namar kane ka daw ha u snem 2018 la wan rah noh ïa kane ka Aspirational District da u Myntri Rangbah ka ri, u Narendra Modi bad ka thong hi ka long ban saindur bad ban wan rah ka jingkylla ha ki kam pynroi lyngba ki projek bapher bapher lyngba ka thong jong kane ka Aspirational District.
“Ka Ri Bhoi District ka la kiew kyran ruh halor ka jingpyntreikam ïa ki kam pynroi ka Aspirational District, ka dei namar ba ki ophisar sorkar bad ki nongtrei sorkar ki ai ka jingïatrei lang bad halor ka jingpyntreikam ïa ki projek ne ki kam pynroi ka Ri Bhoi District ka la kiew sted bha ha kaba ïa dei bad kata ka Basic Infrastructure, Health and Nutrition, Education bad kiwei kiwei kiwei ki kam pynroi bad mynt au snem 2022 ka Ri Bhoi ka la poi sha ka kyrdan kaba 5 napdeng ki 115 tylli ki District kiba pyntrei bha ïa ki kam pynroi kiba dei katkum ka thong jong ka Aspirational District” ong u Myntri Khynnah ka sorkar pdeng, u Krishan Pal Gurjar.
Haba ai mynsiem ïa ki ophisar sorkar bad ki bor synshar District ba kin nang trei janai ïa ki kam pynroi kane ka Aspirational District, u Myntri Khynnah ka sorkar dpeng, u Krishan Pal Gurjar, u la ong ruh ba dei namar ba ïa ki kam pynroi la pyntreikam bha ha kane ka District, ki la ioh ruh ka khusnam pisa kaba long Rs. 1 klur bad hadien Rs. 4 klur na ka NITI Aayog ha u snem 2022 kaba dei hi halor ki kam ban dang kyntiew ïa ki kam pynroi jong kane ka District.