Shillong, Nohprah 21: La ïoh ban pynlong ïa ka Mawphanlur Runsafari Half Marathon kaba seisoh ba la pynlong ha ka 14 tarik Nohprah, 2024 ha ka shnong Mawphanlur, Meghalaya.
ïa kane ka jingïakop mareh la pynlong da ka Real Sports India (kaba la tip ruh kum ka Sportive) ryngkat ka jingkyrshan na ka tnad jngohkai jong ka Sorkar Jylla Meghalaya, ka Indiatourism Shillong, ka tnad jngohkai ka Sorkar India, ka Social Empowerment Department of Meghalaya, ki bor synshar District jong ka West Khasi Hills bad Eastern West Khasi Hills ryngkat ka jingïatreilang bad ki nongshong shnong ka Mawphanlur.
La sdang ïa ka jingmareh ha ka por 8.45 baje mynstep bad la kaweh ïa ka lamai da u Amit Gupta – Assistant Director jong ka Indiatourism Shillong, u Bah Clement Phorword Mawkon (Addl. Deputy Commissioner) bad u Bah Francis Sordar (Rangbah shnong jong ka Mawphanlur).
Ki don lai ki bynta ha kane ka jingïakop mareh ba kynthup ïa ka 21 km, 10 km bad kaba 5 km, ba la pynmareh lang na surok bad naka lynti ba long them jong ka Shnong. Ka dei ka jaka ba jwat tam hynrei ka jaka them ba itynnat kumba la pynpaw da ki nongmareh bala wan ïashimbynta.
Ki nongmareh ba la wan ïashimbynta ki long haduh 313 ngut kynthup na Delhi, West Bengal, Guwahati bad na ki dong bapher bapher jong ka jylla Meghalaya.
U Shishir Shahoo u la long u nongmareh ba la rangbah tam ha ka rta ba 72 snem, ban pyndep ïa ka 10km.
Ka jingthmu ba kongsan da kaba pynlong ïa kane ka jingïakop mareh ka long ban kyntiew ïa ka kam jngohkai ha kane ka thaiñ bad ban pynshlur ïa ki samla ban kiar na ki kam ryngkat ka phang kaba ‘Ong Em ïa u Drok’ lane ‘SAY NO TO DRUGS’.
Kine ki long ki kyrteng jong ki nongjop :
Ha ka 21km- Kynthei- 1st Nerisa Nongrum, 2nd Ibanuilen Khongwir, 3rd Florika Swer. Katba ha ka 21 KM- Shynrang :- 1st Tiboklang Biam, 2ND- Hepstarly Lyngkhoi, 3rd- Donkupar Marbaniang.
Ki kynthei ba jop ha ka 10 KM- ki long:- 1st- Marqueenless Ramsiej, 2nd- Claire Zones Zala Kharbhih, 3rd – Mary Queen Pale. Nangta ki shynrang ba jop ha ka 10KM ki long :- 1st – Wankyrmen L Mawphlang, 2nd- Wolbetstar Ramsiej, 3rd- Rangki Jonathan Pathaw.
Haba phai sha ka ka 5KM ki kynthei ba la jop ki long :- 1st-Angelista Syiemlieh,
2nd- Ayden Fedenzo N Marweiñ, 3rd- Lamshwamaphei Marngar. Na ka liang ki shynrang kiba jop ha ka 5KM ki long:- 1st- Bankerlang Rani, 2nd- BIB NO. 5136, 3rd- Keshar Prasad Gupta – Kolkata.
Ha kaba kut u bah Clement Phorword Mawkon bad u bah Francis Sordar ki la pynpaw ïa ka jingsngew jong ki halor ki bynta kiba bha bad kiba lah ban mih na kum kine ki jingïalang na ka bynta ban kyntiew ïa ka kam jngohkai pyrthei jong ka Mawphanlur bad ai khublei ïa baroh ki nongmareh kiba la wan ïashim bynta da kaba khot sngewbha ïa ki na bynta u snem ban wan ban pynlong ïa kane ka lympung kaba kham heh.
