Shillong, Lber 31 : U briew uba ktah kti ïa u Nongñiah Sumo ha kine ki khyndiat sngi ba la dep uba kyrteng u Lurshai Pyngrope u la wan mih bad leit hajir hi hakhmat u OC jongka Jhalupara Police Station naduh mynta ka sngi.
Haba ïakren bad u SP ka East Khasi Hills u bah Vivek Syiem u la ïathuh ba hadien ba la phah notice sha utei u briew ha kine ki khyndiat sngi hadien ba u la ktah kti ïa u nongñiah Sumo na ka thaiñ Sohra kaba la jia ha Umshyrpi ha ka taiew ba la dep mynta ka ka sngi u la wan mih hi hakhmat u OC ka Jhalupara Police Station bad na ka liang ki pulit ki la ïalam tian bishar ïa u.
U SP u la ïathuh “ Une u briew u briew u hap ban ïatrei lang bad ki pulit ha ka jingtohkit bniah ki pulit ïa u halor ka jingkam jongu ba u dei u pulit bad kumjuh ruh halor ka jingbyrngem jongu ban sei da ka pistol. Nalor kane wat halor ka jingktah kti ïa u nongñiah Sumo ruh. Lada jia ba um ïatrei lang un ngat ha ki kyndon aiñ kiba pyrkhing bha. Na ka liang ki pulit hadien ba la dep tohkit kin sa charge sheet ïa u kat kum ki kyndon aiñ ba la pyngat ia u”
La ïathuh ruh ba une u Lurshai un hap ban wan mih sha Police Station man ba donkam ban tohkit bniah ïa u da ki pulit.
