Shillong, Naiwieng 11 : Ka Parliamentary Standing Committee, Rajya Sabha ha ka sngi Thohdieng ka la wan ban buddien ïa ka jingpyntreikam ïa ki skim ha kane ka jylla kiba pyntrei lyngba ka jingkyrshan pisa jong ka sorkar pdeng, kum shi bynta ka jingwad bniah ha kane ka thaiñ shatei lam-mihngi jong ka Ri.
Kine ki skim kiba katei ka kynhun ka wan ban buddien kidei kiba la mang tyngka lyngba ka tnad ba peit ïa ki kam pynroi ha ka thain shatei lam-mihngi jong ka Ri ba la tip kum ka tnad Development of North Eastern Region (DoNER).
Ha katei ka jingïalang kaba long ha Vivanta Meghalaya la donlang ruh naduh u Chief Secretary ka Jylla, Bah DP Wahlang nalor kiwei kiwei ki heh sorkar jong ki tnad bapher bapher ka sorkar jylla.
Ki tyllong khubor ki ïathuh ruh ba ka Parliamentary Standing Committee (PSC) kan pynkhreh ïa ka kaiphod bad phah sha ka Ministry of DoNER bad na ka liang ka Ministry pat kan sa phah ïa katei ka kaiphod sha ka North Eastern Council (NEC) bad ruh sha ka sorkar jylla ban pyntreikam. Katei ka kaiphod kan kynthup lang ruh ïa ki jingkdew ne ki jingbthah ym tang na ka bynta ka Meghalaya hynrei na ka bynta ka thaiñ shatei lam-mihngi baroh kawei.
Hadien ka jingïalang, ki dkhot jong ka PSC ki la leit ruh ban jurip ïa ka Treatment Plant jong ka Greater Shillong Water Supply Scheme kaba don ha Mawphlang. Hadien kane, ka Committee kan leit ruh sa sha Assam ha ka 14tarik mynta u bnai.
