Shillong, Lber 30: Ka khubor ba sngewtynnad ka long ba ki khynnah skul ka Myngken Christian Higher Secondary School, ki la la ïoh ba wan ha ka kyrdan kaba lai, ha ka jingleit ban mihkhmat ïa la ka jong ka ri, sha ka lympung ïalehkai phutbol ba la tip kum ka 2nd Edition of Indo-French Tournament. kaba la long ha nongbah Paris, France, naduh ka 24 haduh ka 29 tarik mynta u bnai.
Ka jingïaidlynti jong ka kynhun ïalehkai ka Myngken Christian HSS ha kane ka lympung ka long kaba itynnat, ha kaba ka la sdang shuwa da jingjop pyrshah ïa ka kynhun ïalehkai jong ka Grigny FC da kaba thep haduh 4 kol, ha kaba u Alicestar Thangkhiew u la lam khmat ïa ka kynhun ban thep ar tylli ki kol bad ia ki kol kiba sah la thep da u Mebanlamlynti Masharing bad u Franky Dkhar.
Katba ïa ka kyrdan kaba nyngkong bad kaba ar na kane ka lympung ïakhun la bat da ki khynnah ïalehkai jong ka Versailles FC bad ka Sarcelles FC.
“Ka kynhun ka la lah ba kan ïalehkai bha, kampher wat haba ka la hap ruh ba kan ïakhun bad aireng bad ki kynhun kiba khlaiñ, pynban wat hapdeng ka jingtynjuh borbah, ki khynnah ki la aiti shisha ïalade met bad mynsiem, kaba la pynlong ïa ki ban lah ban ïoh bat ïa ka kyrdan kaba lai” kane ka long katkum ka kyrwoh kaba la phah da u coach jong kane ka kynhun u Bah Bobby.L. Nongbet (AFC ‘A” Licence) ba dei u District Sports Officer ka Ri-Bhoi District.
