Shillong, Naiwieng 06 : I Kong Eldora Betsy Lyngdoh i nongshong shnong na Mawkhar, Shillong i la ïoh ban khur ïa ka kyrdan kaba ar ha ka ïakob thoh poitry kaba la wan ban shim bynta da ki riewshemphang na kylleng ki ri ka pyrthei ïa kaba la tip kum ka International Literary Prize City of Arona 2025 ha ka thup Unpublished Poetry Section.
I Kong Betsy iba dei i kurim jong i Bah Ransom Sutnga i la dei tang ma i marwei ba jop ha kane ka jingïakob na India ha kaba ïa ka kyrdan kaba nyngkong la jop da u nong Canada, ïa ka kyrdan kaba ar pat la ïa sam lang hapdeng jong i bad ka nong France bad ïa ka kyrdan ba lai pat la ïasam hapdeng u nong Belgium bad u nong Taiwan.
Na ka liang i Kong Betsy i la pynpaw ïa ka jingkmen kaba khraw ba i la ïoh ban jop ha kane ka jingïakob da kaba ïoh ban wan ha ka kyrdan kaba ar. “Nga dap da ka jingsngewnguh ïa ka Cultural Circle jong ka Arona na ka bynta kane ka jingithuh bad ka jingsngewnguh ka leit ruh sha ki bor pynïaid bad ruh sha ki nongbishar. Kane ka jingjop ka ai mynsiem shuh shuh ïanga ba ngan lah ban pynpaw shuh shuh ha ka jingthoh poitri,” i la pynpaw. Ha kane ka jingïakob ki la don haduh 28 tylli ki ri jong ka pyrthei kiba wan ban shim bynta ha kaba la plie lad ïa kiba tbit ha ka kam thoh jingïathuh khana lyngkot bad kumjuh ruh ha ka poitri.
