Wah signboard beaiñ ka Shnong Umsarang ha u pud u sam ba don hapdeng ka jingïakajia

Shillong, Nailur :Na ka liang u Secretary Shnong jong ka Shnong Pynthorsohma, Ri Bhoi District, u Bah S. Iawphniang ula ong ba kila ïoh ïa ka jingtip ba ka jingïakajia pud hapdeng ka Hima Mylliem bad ka Hima Khyrim Syiemship ka dang ïai sah haduh kine ki sngi hapoh District Council Court, Shillong.
Kane ka mukotduma hapdeng kitei ki arliang mamla ka dang ïai sah hapoh ka jingbishar jong ka District Council Court ha kaba kam pat shym la lah ban ai ïa kano kano ka rai mynta la bun bun snem.
Hynrei, ka long ka jingkyndit kaba khraw ban ïohi ba ha ka 20 tarik mynta u bnai, ka Dorabr Shnong Umsarang da ka jingaibor jong u Rangbah Shnong kala wan ban sieh bad thung da ka signboard hapoh u pud u sam jong ka jaka kaba dang hap hapoh ka jingpeit jingkhmih da ka shnong Pynthorsohma kaba dang hap hapoh ka jingpynïaid jong u Syiem ka Hima Khyrim Syiemship.
Na ka liang utei u secretary ula ong ba wat na ka liang ki bor pynïaid district ruh ki tip bha ba ka dei ka jaka kaba dang don hapdeng ka jingïakajia (Disputed Area).Ka jingkylli mynta ka long mano ba la ai bor ïa katei ka shnong Umsarang ban wan sieh ne wan thung signboard ha katei ka kyntoit jong ka shnong Pynthorsohma.
Kumta khnang ban lait na kano kano ka jingjia ba sngewsih la kyntu ïa ki bor pynïaid district naduh u DC bad SP ka Ri Bhoi District, ïa ki Syiem ki Sordar jong ki Raid ban shimkhia mardor halor kane ka bynta bad ruh ban shim kam pyrshah ïa ki briew kiba donkti ha kaba pynkheiñ ïa ki kyndon aiñ jong ka ïingbishar ka District Council.
Nalor kata na ka liang utei u secretary ula ong ruh ba wat ka jingtrei jong ka NREGS kaba la wan na ka ophis u Block Development Officer (BDO), kaba dt. 24.04.2017, na ka bynta ban shna ïa ka pung um dih ha shnong Pynthorsohma la hap ban pynsangeh noh shwa namar kane ka jaka kaba dang don hapdeng ka jingïakajia kala don hapoh ka ïingbishar ka District Council, Shillong, kata katkum ka T.S No. 10.09.2011.
Kumta ruh na ka liang utei u nongïalam shnong ka Pynthorsohma ula ong ba kane ka jingleh jong u Rangbah Shnong ka Umsarang ka jingïuhroit ïa ki kyndon jong ka aiñ, bad khamtam eh ïa ka ïingbishar ka KHADC kaba thmu ban pynïaid beit ïaid ryntih hapdeng ki it ki hima bad ki shnong ki thaw.