Shillong, Jylliew 02: U nongwad RTI bapawkhmat hapoh ka jylla u Bah Disparsing Rani ha kine ki khyndiat sngi u la pan jingtip lyngba ka Right to Information (RTI) na ka Indian Institute of Technology (IIT) Roorkee halor ka jingtwa jong ka tnum pyllun ka Ingdorbar Thawaiñ ba thymmai jong ka jylla kaba la tei ha New Shillong Township, Mawdiangdiang ha ka 22 tarik mynta u bnai.
U BahDisparsing Rani ha ka jingïakren bad ki lad pathai khubor ha ka sngi Baar ula ïathuh ba ka jingpan jingtip na ka IIT Roorke ka long ba u paidbah un dup ïoh jingpynshai halor ka jingtwa jong kane ka tnum pyllun.
“Kane ka dei ka kam kaba sngewkhia bha, ki (Sorkar) kynnoh ïa ka IIT Roorkee ba ka phiel ka Design. Ka sngewkhia bha kato (ka jingkynnoh). Ha ka jingshisha ka IIT Roorkee ka la dei ban mudui da ka Defamation Case pyrshah ïa ka Sorkar,” ong u Bah Rani.
“Nga la pan da ka RTI hapoh ka IIT Roorkee da kaba buh ruh ïa ka jingkylli, hato phi sngew ïahap neem halor ka jingkynnoh jong ka Sorkar pyrshah ïa ka Institute bad nga la buh ruh ka jingkylli, na ka liang jong ka IIT kan leh kumno halor kane ka jingshah kynnoh ba ka dei shi bynta ka jingpynjah burom ïa ka Institute,” la ïathuh u Bah Rani.
“Nga la pan jingtip lyngba ka RTI halor ka Design jong ka DPR. Nga la pan jingtip ïa ka dor jong ka bai Design, ka jingjrong jong ka tnum pyllun (Dome), ka jingkhia jong ka tnum pyllun,” ong une u nongwad RTI.
Haba kylli, u la ong ba la don kumba san sngi ba u la pan ïa ka jubab da ka RTI na ka IIT Rookee.
Ha kaba ïadei bad kane ka jingjia, ka IIT Guwahati ka la ai ktien sha ka tnat PWD (Building) jong ka Sorkar Jylla ban ïadon bynta kum ka mamla tohkit ha ka jingkhyllem jong kane ka tnum pyllun ha ka Ingdorbar Thawaiñ ba thymmai.
Ka Seng Congress bad ka Trinamool Congress ki la sangah naphang ïa ka Sorkar MDA ba la ïalam da ka NPP da kaba kynnoh ba ka jingkhyllem jong kane ka tnum pyllun ka dei na ka jingbamsap bad dawa ruh ba ka dei ban aiti ïa ka jingtohkit sha ka Central Burea of Investigation.
