Wad ïa ki shnong bym don skul, bthah ka KHADC ïa ki MDC

Shillong, Naitung 06 : Ka Liang Pyrshah ha Iing Dorbar jong ka KHADC ki la kyntu ïa ka Executive Committee ba kan kyntiew noh ïa ka song jingïarap ba ki ju ai sha ki skul Lower Primary bad ruh ban ailad noh ba uwei uwei u MDC ïoh la kumno kumno lai tylli ki skul ban noh jingïarap.
“Tang 36,000 tyngka ka dangduna bha, hato lah neem ban pynkiew noh ïa ka jingïarap bad ruh ban ai sa kawei ka skul khnang ba uwei uwei u MDC un ïoh ban ai jingïarap lai tylli ki skul,” ong u Bah Gabriel Sohshang, MDC ka Nongstoiñ ha ki kynta kylli jingkylli jongka Dorbar Lyiur kaba long ha kane ka sngi Balang.
“Ïa kane ngin sa bishar bad ïa pyrkhat ha ka EC kumno ban kyntiew ïa ka song jingïarap bad ruh ïa ki skul,” ong u Executive Member ka tnad Development, Bah Martle N Mukhim haba jubab ïa ka jingkylli.
Shwa kane na ka liang u MDC ka Mylliem, Bah RV Lyngdohu la ong ruh ba la ka Council ka don neem ka jingthmu ban wadlad noh na ka sorkar India kum na ka tnad Tribal Affairs na ka bynta ban kyntiew ïa ka pule puthi kaba ka jingdon ki khynnah ba pep skul shiteng por ka jur bha.
Na ka liang u Bah Carnes Sohshang, MDC ka Mawkyrwat u la ong ba ki don bun ki shnong ki bym don skul, kumta u la kyntu ïa ka Council haba ka noh jingïarap ba ka donkam ban peit noh khambha ïa kito ki shnong ki bym pat don ki skul.
Halor kane, u EM u la kyntu ïa ki MDC ba kin wad ïa ki shnong ki bym pat don ïa ki skul ba ban pyntip sha ka EC khnang ban lah pat ban ai jingïarap ïa ki. Shuh shuh u la ong ruh ba ka jingïarap kan dei beit tang na ka bynta ar tylli ki skul.