Shillong, Kyllalyngkot 02: Ka jingïalehkai ba kyrpang jong u Akash Kumar Choudhury (khur 5 wiket) bad u Lerry Sangma (51 ron) ka la ïarap ïa ka Meghalaya ba kan pynliem ïa ka Arunachal Pradesh da hynriew (6) wiket ha ka jingïalehkai plate group jong ka lympung Vijay Hazare Trophy 2025-26, kaba la long ha Ranchi ha ka 31 tarik Nohprah, 2025.
Haba phaidien, ka Meghalaya ka la pynliem ïa ka Mizoram ha ka jingïalehkai ba nyngkong ha ka sngi shuwa ka Khrismas shuwa ba kan shah rem ha ka Nagaland bad ka Bihar ha ka 26 bad 29 tarik u Nohprah. Hynrei ka kynhun ka la wanphai da ka jingjop pyrshah ïa ka Arunachal, kaba la ïarap ïa ka jylla ban dang neh ha ka jingïakhun ban ïoh jaka ha ka phainal.
Ka Arunachal ka la jop ïa ka jingkynting pisa (toss) bad ka la jied ban tied nyngkong hynrei ka la shah pynkut noh tang na ka bynta 189 ron na ki 44.2 ober. Namar ba ka net run rate (ka jingheh ha ka jinglah ban kamai ron) ka lah ban don bynta ban rai mano ban rung sha ka phainal, ka Meghalaya kam shym la pynlut por haba beh ïa ka thong bad ka la pyndep ïa ka kamram tang ha ki 23.1 ober, kaba la ai ïa ka run rate kaba 8.33 na ka bynta ka jylla.
U Techi Doria u la long u nongtied ba seisoh tam jong ka Arunachal, ha kaba une u kapten u la lamkhmat da ka spah ron shuwa ba un long u nongtied ba khatduh ban khyllem (out) hadien ba kamai 106 ron da u Abhishek Kumar (1/29 ha ki 6.2 ober).
Uba la pawkhmat ha ka boling na ka bynta ka Meghalaya u dei u Akash, uba la tyngshaiñ na ka por sha ka por, wat ha ki ar tylli ki jingshah rem. U la lah ban khur 6/44 pyrshah ïa ka Mizoram bad pynbud sa 5/26 pyrshah ïa ka Arunachal – kine ki jingkheiñ kidei ki sien ba nyngkong jong u ban pynhap 5 wiket tam ha ka jingïalehkai kriket List A. Kiwei pat kiba la khur wiket ïa ka Meghalaya ki long u Riboklang Hynniewta (1/20) bad u Anish Charak (1/35).
U Kush Agarwal (22 ron na ki 37 bol) bad u Arpit Bhatewara (36 ron na ki 26 bol) ki la sdang ban tied ïa ka Meghalaya bad noh synñiang 54 ron. Hadien ba u Arpit u la shah pynhap noh (out), u Akash u la mih bujli kum u nongtied ba 3. Hadien ba u la dep ban pynpra ïa ka rekod jingïalehkai kriket first-class da kaba khyrwit 8 sien lynter ki hynriew ron (sixs) pyrshah ïa kajuh ka kynhun ha ka Ranji Trophy mynta ka samoi, u la long u nongtied ba hakhmat eh ba ka Meghalaya ka kwah ban pynurlong ïa ka thong kham stet katba lah.
Tang na ki 17 tylli ki bol u la thlieh lai tylli ki saw ron (fours) bad saw tylli ki hynriew ron (sixs) ban kamai 42 ron. U dei u wiket uba saw ban shah weng (out) bad ka Meghalaya ka la poi sha ka 115 ron ha katei ka por. Nangta ka jingïatreilang kaba khlem sangeh kaba 78 ron da u Jaskirat Singh Sachdeva (28 ron khlem out) bad u Lerry (51 ron khlem out) ka la pyndep ïa ka kamram ban kamai ïa ki ron ba dang sah.
U Lerry u la jan ïaryngkat bad u Akash ha ka strike rate (jinglah ban kamai ron naki khyndiat bol), u la donkam tang 25 tylli ki bol ban kamai shiteng ïa ka spah ron, ka sien kaba lai jong u ha ka jingïalehkai kriket List A. Ka dei ka jingïalehkai kaba la buh thikna ïa u ha ka jingïakhun ban ïoh ïa ka nam ‘Player of the Match’ hynrei ka khusnam ka la leit sha u Akash namar ka jingïalehkai kaba kyrpang ha baroh ki liang.
Ka Meghalaya mynta ka don ha ka kyrdan kaba saw da kaba kamai 8 poiñ bad kan ïakhun ïa ka jingïalehkai round robin kaba khatduh pyrshah ïa ka Manipur kaba wan ha ka kyrdan kaba ar (12 poiñ) ha kane ka sngi Saitjaiñ. Ka jingjop ïa ka Meghalaya kan pynlong ïa kine ki arliang mamla ban ïaryngkat poiñ. Kumjuh ruh ka Nagaland (8 poiñ) ka don ha ka jingïaknieh bad kan aireng pyrshah ïa ka Arunachal mynta ka sngi. ïa mynta ka Nagaland ka don ïa ka net run rate kaba bha tam napdeng kine ki lai tylli, da 0.947, katba ka Manipur ka long 0.511 bad ka Meghalaya ka long 0.344. Kine ki lai kynhun kin ïaknieh ban ïoh ïa kawei ka jaka ha ka phainal ha kaba kin ïakhun pyrshah ïa ka Bihar, kaba la pynthikna ban ïoh rung da kaba khur 16 poiñ.
