Urlong ka jingdawa ka MCTODA, mynjur ki trai karkhana ïa ka 120 trok shisngi ïa ki trai muluk

Shillong, Naiwieng 27 : U Symbud Myntri Rangbah ka Jylla ba peit ïa ka tnad Transport, Bah Sniawbhalang Dhar ha ka sngi Palei u la ong ba ki kompeni dewbilat ki la mynjur ban ai kit haduh 120 trok shisngi na ka bynta ki nongkhaii trai muluk da kaba sdang shwa 100 trok naduh ka sngi Thohdieng bad kaba sah 20 trok pat kan sdang naduh ka 01tarik Nohprah mynta u snem.
Ïa kane ka soskular la shim bad mynjur lang ha ka jingïalang ba la khot da u Symbud Myntri Rangbah ryngkat bad ki nongïalam jong ka Jaintia Hills Cement Manufacturers Association (JHCMA) nalor ki lai tylli ki synjuk jong ki trok kamai ba kynthup ïa ka Jaintia Hills Truck Owners & Drivers Association, East Jaintia Hills Truck Owners & Transporter Association, bad ka Meghalaya Commercial Truck Owners & Drivers Association.
Ha ka jingïalang, ka kynhun ki trok kamai ki la pynkynmaw biang ïa ka ishu kaba ki rah mynshwa, kata ban kyntiew shuh shuh ïa ka bhah kit mar jong ki trai muluk na ka 80 tylli shi sngi sha ka 120 tylli ki trok.
“Kumta ha ka jingïalang kaba long mynta ka sngi, ki kompeni dewbilat ki la mynjur ïa ka jingdawa ki trok kamai bad kumta mardor hi naduh lashai (sngi Thohdieng) kan sdang noh 100 tylli ki trok bad ïa ki 20 tylli kiba sah pat yn sdang naduh ka 01tarik Nohprah,” la ïathuh u Symbud Myntri Rangbah haba kren bad ki lad pathai khubor hadien ka jingïalang.
Haba kren pat halor ka dor bai kit mar shabar jylla, u la ong ba na ka liang ka sorkar jylla a la ïoh ïa ka jingai jingmut na ki stad ain ba kam lah satia ban pyntreikam da ka dor na ka bynta kiwei pat ki jylla.
“Da ïaid katkum ka aiñ, kam lah satia ïa ka sorkar Meghalaya ba kan pyntreikam ïa ka dor na ka bynta kiwei ki jylla,” ong u Symbud Myntri Rangbah da kaba ïathuh ba ïa kane ka mat la dep ban pan jingmut ruh na u Advocate General.
Shuh shuh u ïathuh ba ka ka dor na ka bynta ka bai kit mar hapoh ka jylla la ïa mynjur ba kan long 9 tyngka shi ton na ka bynta shi kilometer.
Tangba u ong pat ba ki kompeni dewbilat pat ki la pynpaw ba ka dor 9 tyngka ka la heh bad ka lah ban ktah wat ïa ka dor dewbilat.
“Kumta ha ka jingïalang, ki kompeni dewbilat ki la pynsngew ba ka dor 9 tyngka ka la heh bad kumta ki la kyrpad ïa ki ban pyrkhat biang,” la bynrap shuh shuh u Symbud Myntri Rangbah.
Halor kane ka mat, u Bah Sniawbhalang u la ïathuh ba u la kyntu ïa kine ki arliang mamla kata ïa ki synjuk ki trok kamai bad ki kompeni dewbilat ba kin ïa pynbeit hi ïa kane ka kam hapdeng jong ki hi.