Urlong ka jingdawa ka JNC-WZ ban buh ïa u tower thymmai hajan Woodland Hospital WJHD

By Mawphor Editor On Jan 29, 2026

Khliehriat, K’Lyngkot 28 : Ki dkhot jong ka Jaiñtia National Council (JNC) Western Zone, hapoh ka jingïalam u President u bah Hamehi Bamon mynta ka sngi ki la leit ïakynduh ïa ki nongtrei jong ka company Airtel bad ka seng ka la dawa ba dei ban pynbiang noh mardor ïa ka network kaba biang ha Hospital Woodland WK kaba don ha West Jaiñtia Hills District namar ha katei ka hospital ka Airtel network kam da biang bha bad ka ju buh jingeh ïa ki briew kiba pyndonkam da ka network airtel.
Katei ka jingleit ïakynduh ka JNC Western Zone ïa ki nongtrei jong ka company Airtel ka dei hadien ba ka seng ka la ioh pdiang ïa ki jingujor na ki paidbah kiba la pyntip ba ka network airtel ka tlot bha bad kam biang bha ha shnong Sabahmuswang ha ka jaka ba don ka Woodland Hospital, ki nongïalam bad ki dkhot ka seng da lade hi ki la lap ba ka long kaba shisha ba ha katei thaiñ ba don ka hospital kam biang bha ka network Airtel.
Ka seng ka la dawa ruh ban buh noh u wei u Tower ba thymmai ha shnong Sabahmuswang bad maham ruh ïa ki nongtrei ka airtel ba lada kim leh kloi katkum ka jing dawa ka seng kan sa leit ban khang khyrdep noh ïa baroh ki ophis trei kam jong ka company Airtel kiba don hapoh ri lum Jaiñtia.
“Ha ka 27 tarik mynta u bnai Kyllalyngkot ha ka por janmiet u Manager jong ka company Airtel na Shillong lem bad ki heh jong ka company Airtel ki la pynlong da ka conference metting lyngba ka phone call ryngkat bad u President JNC Western Zone, u bah Hamehi Bamon bad ha ka jingiakren na ka liang jong ka Airtel company ka la rai ban shna shwa u wei u tower thymmai ha shnong Sabahmuswang kaba long kat kum ba la dawa ka seng, ka company ka la kyrpad ruh ïa ka seng JNC ban iarap lem ban wad jaka bad na ka liang ka seng ka la shimkhia mar mar na ka bynta kane ka kam bad ka la lah ban pynioh ruh ïa ka jaka ka ba don marsyndah ka Hospital Woodland WK Sabahmuswang bad mynne mynstep na ka liang ki briew jong ka Airtel ki la wan ban peit (Survey) ïa kata ka jaka ban buh ïa u tower bad ki la kular ruh ban pynieng noh ïa u tower ba thymmai ha shnong Sabahmuswang” ong u kyrwoh.
Na ka liang u bah Hamehi Bamon, uba long kum u President jong ka JNC Western zone u la pynpaw ka jingsngewnguh shi katdei eh ïa ka Airtel company ba ka la sngap ïa ka jingdawa ka seng kaba long na ka bynta ka jingbit jingbiang ki paitbah.