Shillong Risaw 07: U Syiem barim ka Hima Nongspung, u Patrick Syiemïong u la ujor sha Meghalaya High Court ban ïakhun ïa ka jingshah pynsangeh kam shipor da ka Khasi Hills Autonomous District Council (KHADC).
Ka KHADC ha u Nailur u la Paiem Syiemïong ha u Nailur u la shah pynsangeh kam shipor na ka khet Syiem jong ka Hima Nongspung. Na ka liang ka KHADC ka la thung Syiem ba shipor ïa u Bah Kyntiewborlang Syiemlieh (Acting Syiem).
Ha ka jingbishar ïa ka Writ petition jong u Paiem Syiemïong ka High Court bench jong u Justice Wanlura Diengdoh la bthah ïa ka KHADC ban phah ïa ka jubab ïa ki mat ba la pynpaw da u Paiem Syiemïong ha ka jingkyrpad jong u.
Ïa u Paiem Syiemïong la mihkhmat da u Lesley Khyriem katba na ka liang ka KHADC la ïasaid da u Themis T. Diengdoh.
Na ka liang ka ïingbishar ka la buh ïa ka sngi ban bishar biang halor kane ka kam kaba dei ha ka 22 tarik mynta u bnai.
Lah ban pynkynmaw ba dangshen u EM ka Elaka jong ka KHADC u Bah Jambor War u la ong ba ka council ka la bud ïa ki kyndon haba pynsangeh kam shipor ïa u Paiem Syiemïong.
Katkum ka jingong jong u Bah War, kane ka jingpynsangeh kam shipor ka long hadien ba um lah ban ai ïa ka jubab halor ki jingshah kynnoh pyrshah ïa u, kaba kynthup ba u la ai jingbit ïa ka sorkar Assam ban shna ïa ka surok hapoh u pud u sam jong ka jylla Meghalaya.
“Halor kane ka jingshah kynnoh la pynsangeh kam noh shipor ïa u Paiem Syiemïong bad la thung ïa ka jingtohkit ban lap ïa ki jingshisha ha kaba ïadei bad kane ka jingshah kynnoh,” ong u Bah War.
“Lada kine ki jingshah kynnoh pyrshah ïa u ki long kiba bakla un shah thung kam biang kum u Syiem,” u la bynrap.
