Ujor u MLA ba pyndonkam khlem jingbit ïa ka jaka ba la ai sha ka CSOHSL ha New Shillong
Shillong, Nailur 24 : U MLA ba la shah sospon jong ka VPP na North Shillong u Bah Adelbert Nongrum u la ujor halor ka jingpyndonkam khlem jingbit ïa ka jaka Sorkar na ka bynta ban leh ïa ki kam khaii ha ka jaka ba la ai sha ka Civil Service Officers Housing Society Ltd (SCOHSL) ha New Shillong Township.
Ha ka jingujor ba la aiti sha u Secretary ka tnat Pynroi Sor ha ka sngi Balang, u Bah Nongrum u la ai por 30 sngi ïa ka tnad Pynroi Sor ban ai jubab kaba batai bniah ïa ki kam ba la leh, hynrei lym kumta u lah ban ujor sha ka aiñ na ka bynta ka jingmyntoi jong ki paidbah.
U Bah Nongrum u la kynnoh ba ha ka jaka ba la ai sha ka Civil Service Officers Housing Society Ltd., la pyndonkam ban pynïaid ïa ka Institute Guest House na ka bynta ka Indian Institute of Management (IIM) Shillong, da kaba pynkheiñ ïa ki kyndon jong ka jingai jaka.
Katkum ka jingong jong u, ka jubab halor ka jingkylli ba la buh ha ka Dorbar Synrai jong ka Ïingdorbar Thawaiñ kaba dang shu kut shen, ïa ki jingtip la ai da u Symbud Myntri Rangbah ka Jylla uba khmat ïa ka tnat Pynroi Sor da kaba pynthikna ba ïa ka IIM Shillong Institute Guest House la pynïaid na kawei ka building kaba don ha ka Plot No. 27 ha Lum Jingsuk Homes, New Shillong Township, Mawdiangdiang, ha ka kyrteng jong u Bah D. P. Wahlang (na ka bynta ban shna iing).
U Bah Nongrum u la kdew ba ka Deed of Handing Over/Taking Over No. MUDA.14/2007-08/15 kaba la thoh ha ka 20 tarik, Jymmang, 2009, ka la kdew shai ba ïa ka jaka yn pyndonkam tang na ka bynta ka jingthmu kaba la ai ïa ka.
“Halor ki jingshisha bad ki jinglong ba la kdew haneng, nga aiti ïa kane ka jingujor na ka bynta ka jingmyntoi paidbah ba ym dei ban shah ïa ki jaka Sorkar ban pyndonkam khlem jingbit. Ka long kaba shai bha na kawei na ki kyndon ha ka Deed of Handing Over/Taking ba la kdew haneng ba “Yn pyndonkam ïa ka jaka tang na ka bynta ka jingthmu kaba la ai ïa ka”, bad kumta nga kyrpad ba ka tnad Urban Affairs jong ka Sorkar Meghalaya kan shim noh mardor ïa ki sienjam kiba donkam ban pynsangeh noh ïa ka kam khaii ha Plot No. 27, Lum Jingsuk Homes, New Shillong Township, Mawdlangdiang,” la ong u MLA ka North Shillong ha ka jingujor.
“Katkum kane, nga khmih lynti ïa ka jubab da ka jingthoh halor ki sienjam ba la shimkhia da ka tnad Pynroi Sor bad/lane da ka Meghalaya Urban Development Authority bad/lane ka New Shillong Township Authority hapoh 30 (laiphew) sngi naduh ba la ïoh pdiang ïa kane ka jingujor hynrei lym kumta ngam banse ban ïaid da ka lynti jong ka aiñ na ka bynta ka jingmyntoi jong ki paidbah,” la maham u Bah Nongrum.