Ujor u Bah Lektor Dkhar ha u DC ïa ka jingdon ki Pharmacy be-aiñ ha East Jaiñtia Hills

Khliehriat, Jymmang, 16: U Bah Lektor Dkhar, uba long u nongshong shnong jong ka East Jaiñtia Hills District dang khyndiat sngi u la ujor ha u Deputy Commissioner jong ka East Jaiñtia Hills District halor ka jingdon jong ki dukan Pharmacy kiba plie beaiñ hapoh ka District.
U la kyntu ïa ka ophis District Medical & Health Officer (DM&HO) bad ïa ka ophis Inspector of Drugs ban jurip bniah ïa ki Pharmacy ba shu plie beaiñ kiba buh jingma ïa ka jingim jong ki briew kiba thied ïa ki dawai.
U la kynnoh ba ki trai jong ki Pharmacy ki ju leh ruh kumba ki dei ki doktor ha kaba ki ju ai drip bad ai injek ïa ki briew ba leit shim dawai. Ym tang katta la kynnoh ba ki don ki dukan die dawai kiba ju lum ïa ki dawai shibun ha kaba kine ki dawai ki dei tang ki doctor kiba lah ban ai sha ki nongpang.
“Watla bunsien nga la ujor sha u District Medical & Health Officer hynrei um shym la leh eiei halor kane,” ong u Bah Lektor.
U la ong shuh shuh katba u dang leit ban jurip ïa kawei ka dukan Pharmacy la kynnoh ba la wan kynsan uwei u briew uba la kam ba u dei u Rangbah Shnong bad u la khanglad ïa u Bah Lektor ban rung hapoh shnong khlem da ïoh jingbit na ki nongpynïaid shnong.
U la pynpaw ka jingsngewkhia ba u bar jylla u bym pat don jingtip eiei ïa ka kam ai dawai u la leh ïa kine ki kam hapoh ka District bad ong ruh ba ki dang don bun ki dukan die dawai beaiñ ïa kiba um banse ban ujor sha u Deputy Commissioner.
Shuh shuh u la ong ba ka jingujor sha u DC ka long namar ka jingpynslem jong u DM&HO ban leh eiei pyrshah ïa ki dukan Pharmacy ba shu mih be-aiñ.
“Ki Pharmacy kiba don ha East Jaiñtia Hills District ki bym long beaiñ ki don tang kumba arphew ar tylli, hynrei baroh ki dei kiba shu plie beaiñ ba shong da ki bar jylla,” la kynnoh u Bah Lektor bad bynrap, “ki bar jylla kiba kam ïalade ba ki dei ki doktor dei namar ki don ki Khasi-Par kiba ïada ïa ki. Ki don ki Pharmacy kiba long beaiñ kiba leh ruh ïa ka kam pohjait ha kaba pynhap khun. Kane ka dei kaei kaei kaba ngam lah ban pdiang. Nangne shakhmat ngin ym sangeh, ngi tur shaphrang ban rat dyngkhong ïa kiba kum kine ki kam jakhlia kiba don hapoh ka district.”
U la maham ruh ïa kiba suplai dawai bad kiba suplai ïa ka dawai Drip ïa ki bym dei ki doktor.
“Ka long kaba sngewsih ruh ba ki don ki Khasi-Pnar kiba ïada ïa ki bar ylla ha kaba ïa ka laisen kaba dei ka jong ki, ki ai ha u bar jylla tang kumba 2 hajar tyngka ha ka shi bnai. U bar jylla u la lah ban leh ïa kano kano ka kam wat ïa ka kam pynïap briew. Kane ka long ka bym lah ban pdiang,” la kynnoh u Bah Lektor.
“Lada ngi lap ïa kum kita ki briew ïa ka laisen jong kito ki Khasi-Pnar ruh dei ban pyndam noh shi syndon. Nangne shakhmat ngan nang pynjur ïa ka jingleit jurip bad peit bniah bad lada lap ngan ujor beit sha u DC,” la maham u Bah Lektor.