Nongpoh, Jylliew 30: Ban wanrah ka jingtip kaba bñiah sha ki paidbah halor ka jingshakri jong ka Committee on Petition jong ka Meghalaya Legislative Assembly, haka jingïatreilang bad ka ophis u Deputy Commissioner ka Ri Bhoi District mynta ka sngi kila pynlong ïa ka prokram ai jinghikai ha Science Hall, Nongpoh.
Ha kane ka prokram, ki dkhot jong ka Committee ki la ai ka jingpynshai halor ka rukom treikam jong ka Committee on Petition bad ka bynta ba ka shim ha ka imlang ka sahlang, khamtam ban iohsngew ïa ka sur jong ki paidbah ha kaba ïadei bad ki jingeh ne jingduna ha ki kam pynroi.
Ïa kane ka jingïalang la pynïaid da u MLA ka Mawlai uba dei ruh u dkhot jong ka Committee. La wan ban shim bynta lang ruh da kiwei pat ki dkhot ka Committee ba kynthup ïa u MLA ka Mawhati Bah Charles Marngar, u Dr. Mizanur R. Kazi, MLA ka Rajabala, u Remington G. Momin, MLA ka Rambrai-Jyrngam bad u MLA ka Nongpoh Bah Mayralborn Syiem.
La sakhi lang ruh da ka jingdonlang u Deputy Commissioner ka Ri Bhoi u Abhilash Baranwal, u Project Director ka DRDA u Raja Brahma, ki BDO na ki 4 tylli ki C&RD Block, ki kynhun SHG bad ki Village Organization bapher bapher na ka district.
Ka jingthmu jong kane ka prokram ka long ban pyntikna ba ki paidbah kin sngewthuh ba lyngba ka Committee on Petition, ki lah ban phah ujor ne pyntip ïa kino kino ki jingeh ba ki ïa kynduh, bad katei ka Committee kan rah ïa ki jingeh jong ki sha ka sorkar ban wad ki lad ki lynti ban weng noh ïa ki jingeh ha ka imlang ka sahlang.
