Shillong, Nailar 21: U Myntri barim bad MLA ba mynshwa ka Dadenggre u James PK Sangma, ula mudui da ka mukotduma elekshon pyrshah ïa u MLA ba mynta ka Dadenggre jong ka Trinamool Congress (TMC) u Rupa Marak, haba kynnoh ba u Rupa u khlem aiti ïa ka Bank Account kum kawei na ki kot ki sla ba donkam haba thep kyrteng kum u kyrtong ïakhun elekshon.
U James Pangsang K Sangma, uba dei u MLA ba lai samoi ka National People’s Party (NPP) na Dadenggre bad hynmen jong u Myntri Rangbah ka Jylla u Conrad K Sangma, ula shah rem ha u Rupa M Marak na Dadenggre Constituency tang da 18 vote ha ka elekshon MLA 2023.
Kane ka jingmudui jong u James PK Sangma ka la poi ha ka miej ïing bishar myn ha ka 14 tarik Nailar. Ka ïing bishar ka la buh ban sa shong bishar biang ïa kane ka mukotduma hadien artaiew.
