Shillong, Rymphang 25 : Ka Nationalist Congress Party (NCP) Meghalaya ka la ujor da ka ejahar (FIR) pyrshah ïa u National secretary barim ka Bharatiya Janata Party (BJP) u Sunil Deodhar, da kaba kynnoh ba u la kren ïa ki jingkren khlem nongrim, ki jingkren pynjah burom kiba thmu pyrshah ïa ki Khristan bad buh jingma ïa ka jingïatylli ha ki jaidbynriew.
Ha ka jingujor ba la mudui ha Sardar Police Station, u Youth President ka NCP Dapkupar Nongrum u la ong ba u Deodhar haba kren ha ka shnong Pynter ha ka 16 tarik u Rymphang, u la kynnoh ba kawei ka Balang ka la buh ïa ki kyndon ban shah ïaki ban wan pule sha kata ka skul bad ki kyndon ki kynthup ban leit jingiaseng, ban kylla niam khristan bad ban pass ïa ka eksamin Bible.
La kynnoh ba u Deodhar u la ong ba ki samla pule ki bym pass ha ka sobjek Bible yn khein ruh ba kim pass satia ïa ka eksamin watla ki pass ha ka sobjek Mathematics bad Science.
Haka FIR, ka NCP,ka ong ba u Deodhar u la kynnoh ruh ba ka sorkar ka don ha ka liang jong ka niam bad ka khanglad ïa ki dkhot Niam Tynrai ban ïoh ïa ka jingshakri ki hospital, ki surok, ki skul bad ka bording lada kim kylla niam.
U Dapkupar u la ong baka jingkren u Deodhar ka dei kaba thmu ban wanrah ïa ka jingsngew ïapher, ka ban pynmong ïa ka jingsngew niam, bad buh jingma ïa ka jingïatylli hapdeng ki niam ha Meghalaya.
Ka Party ka dawa na ki bor Pulit ban pynshitom ïa u Deodhar katkum ka kyndon 196, 197, 299 bad 353 jong ka Bharatiya Nyaya Sanhita, 2023.
