Ujor ka KSU sha ka DSEO ïa ki jingduna ka Barato Govt. UP School

0

Jowai, Nailar, 26: Ka Khasi Students’ Union (KSU) Barato Unit hadien ka jingjurip ïa ki jingduna ha Barato Government Upper Primary School, ka la leit ujor sha ophis treikam jong ka District School Education Officer (DSEO) West Jaiñtia Hills District.
Hapoh ka jingïalam jong u President u samla Ehbok Sten ka seng ha ka sngi Baar ka la aiti da ka jingthoh ha ka ophis DSEO da kaba kyntu ban khmih bniah ïa ka jingbit jingbiang jong ka skul kaba don ha ka shnong Barato.
Ka seng ka la kyrpad na ki bor ba dei peit ban pynbiang ïa shibun ki jingduna naduh ka ïingskul (School Building) kaba la jot bad ka bym i long shuh khamtam ha ki por lyiur bad kumjuh ïa ka kynroh jingker (fencing) namar kane ka skul ka don hapdeng artylli ki surok bad kam long shngaiñ ïa ki khynnah jong katei ka skul bad ruh ka paiñkhana (toilet) kane ka skul ka don tang kawei ka paiñkhana bad ka buh jingeh naduh ki nonghikai bad ki khynnah skul.
Ka seng ka la buh ruh ïa ka jingujor pyrshah ïa ka Headmistress jong kane ka skul hadien ba la ïoh ïa ka jingujor na kiba bun bad ka jinglap hi jong ka seng ba kane ka Nonghikai kam juh wan skul ha ka rukom badei bad ki khynnah skul ki kynduh shibun ki jingeh khamtam ha ki Subject jong katei ka Nonghikai bad na ka liang ka seng ka pynpaw ïa ka jingsngewkhia ïa ka jingleh kiba kum kine ki Nonghikai.
Ka la kyntu ïa ki bor ba dei peit ban leh ïa kaba donkam namar kane ka skul ka long ka lad jingïarap ïa kiba bun ki khynnah ban ïoh lad pule namar kiba bun ki briew ha kane ka thaiñ kiba phah skul ïa ki khun da ki kam bylla bad ka rep ka riang.
Ka ophis District School Education Officer ka la kular ban shimkhia halor kine ki mat kiba ka seng ka la pynsngew.

Leave A Reply

Your email address will not be published.