Ujor ka KSU bad HFU ha ka DC ba pyntuid khyndew ka kompeni shna surok Nongstoiñ-Wahkaji sha ki Pynthor kba

Mawkyrwat, Ïaïong 08: Ka Khasi Students’ Union (KSU) Nobosohphoh Area Unit bad ka Hill Farmers Union, Rangblang ha ryngkat ka jingsynrang ka KSU Mawkyrwat Circle mynta ka sngi ki la leit ban ai ka jingujor ha ka Deputy Commissioner, South West Khasi Hills District Mawkyrwat halor ka jingpyntuid khyndew sha ki pynthor kba jong ka kompany shna surok Nongstoiñ sha Wahkaji.
Namarkata, ka seng ka dap da ka jingsngewkhia hadien ba ka la ïoh sngew ïa ka jingud jingnam jong ki paidbah nongrep naduh ha Shnong Sasniang tet ter shaduh ka Shnong Pombriew-Ladjynrai-Sohsynñiang bad Nongbah Rangblang halor ka jingpyntrei torti ïa ka surok Nongstoiñ sha Wahkaji ha kaba da ka jingpyntuid khyndew sha ki lyngkha kba ka la long ka jingduh kaba khraw na ka bynta ki nongrep jong katei ka dong ka thaiñ baroh kawei.
Hooid! da ka jingwan ki kam pynroi kum ka seng ka dap da ka jingsngewkmen, hynrei sngewsih pat ba lada kum kine ki kam pynroi ki pynjot kylla ïa kiwei pat ki bynta jong ki paidbah khamtam eh ki jaka jong ki nongrep bad ïa kata kum ka seng kam lah da lei lei ban pdiang, namar kine baroh ki dei da ka jingleh bym suid ñiew jong ki nongtrei.
U President ka KSU Nobosohphoh Area Unit, u bah Ferdinand Khardewsaw haba kren ha ki lad pathai khubor u la ong ba ka jingthmu jong ka seng ban leit ïa kynduh ïa ka Deputy Commissioner, South West Khasi Hills District, kong C. Kharkongngor, IAS, ka long na ka daw ba ka kompany shna surok ka la trei bad khlong ïa ka khyndew khlem da kheiñ ïa ki pynthor kba jong ki nongrep ka dong ka thaiñ lyngba ka jingpyntuid khyndew katba mon.
“Ka jingshna ïa ka surok ka dei kaba sdang na Shnong Sasniang tet ter shaduh ka Shnong Pombriew-Ladjynrai-Sohsynñiang bad ha Nongbah Rangblang bad lyngba kane kan long ka jingmyntoi jong ki paidbah nongshong shnong”, u la ong bad hynrei haba pyntrei dei ban da leh ha kata ka rukom ba kan nym ktah ïa kiwei de kum ki jaka rep.
U la bynrap ruh ba halor kane ka jingleit ban ïa kynduh ïa ka Deputy Commissioner, la ong ba ki la dep ban ïa kren mar khmat bad pynsngew ïa kita ki jingeh baroh ba ha kaba na ka liang jong ka ka dei ban tuklar lem halor ka jingleh torti jong kane ka kompany. “Halor kata ka bynta, ka DC ruh ka la kular ba kan sa shimkhia bad leh ïa kaba bha tam ba kan sa ïa kren bad ka tnad PWD (Roads)”, u la ïathuh.
Na ka liang ki Hill Farmers Union, Rangblang Area, ki la pynpaw ba da ka jingdon jong ka surok ka lah ban pynsuk ha ka kit ka bah jong ki nongrep na ka bynta ban pynpoi ïa ki mar ki mata sha ki jaka ba dei ban pynroi, hynrei sngewsih pat lyngba ka jingud jingman jong ki paidbah ba ka rukom pyntrei ïa ka surok ka long kaba torti bad ïa ka khyndew ki la shu theh katba mon bad da ka jingwan jong u slap u ba jur ka khyndew ka la tuid sha ki lyngkha kba jong ki. Ymtang kata, da ka jingtuid jong ka khyndew ka la buh jingeh na ka bynta ki nongrep ban khlong ïa ka namar mynta ka la dei sa ka por ban lur bad thung ïa u kba.
Namarkata, ka union ka buh ka jingkyrpad ba la long kaba lah, kane ka kompany shna surok ka dei ban pyntrei ha ka rukom kaba dei ym ban shu leh torti namar lada trei torti kan buh jingeh ïa u paidbah ba bun balang.
Ha kane ka sngi don lang ruh u bah Rambul Thongni, General Secretary jong ka KSU Nobosohphoh Area Unit ryngkat ki dkhot jong ka Hills Farmer Union, Rangblang.