Ujor ka JNC ha u EE PWD, kynnoh ba trei torti u kontraktor ïa ka surok Raliang-Sahsniang

Khliehriat, Risaw, 25: Ka Jaiñtia National Council (JNC) Western Zone ha ka sngi Thohdieng ka la ujor sha u Executive Engineer ka PWD Shangpung Division u Bah K. Pakma pyrshah ïa u kontraktor halor ka jingkynnoh ba u la pyntrei torti ïa ka surok naduh ka shnong Raliang haduh Sahsniang,West Jaiñtia Hills District
U EE u la kular ba un sa shimkhia ïa kane ka kam bad u la ong ruh ba yn ym lah ban pdiang ïa ka rukom trei torti nangne shakhmat, la ong u kyrwoh ba la phah da ka seng.
Kane ka jingujor ka seng pyrshah ïa u kontraktor ka long hadien ba ki dkhot ka JNC hapoh ka jingïalam u President u Samla Hamehi Bamon ki la hiar jurip ïa ka surok ba la pyntrei lyngba ka skim PMGSY naduh shnong Raliang haduh Sahsniang,West Jaiñtia Hills District hadien ba la ïoh ujor na ki paidbah ka thaiñ halor ka jingpyntrei torti ïa ka surok.
Ha u kyrwoh, ka JNC ka la kam ba ki dkhot ka seng ki la sakhi shisha ïa ka jingpyntrei torti katba ka jingpyntrei ka dang ïaid bad la lap ruh ïa ka jingjot jingpra jong ka surok hadien ba la siang tang hadien katto katne sngi.
“Kum ban shu pynkynmaw ka seng ha ka 17 tarik, Jymmang 2025 ka la lap ïa kane kajuh ka surok kaba pynïasoh na Raliang shaduh Laskeiñ ba ka rukom shna ka long kaba torti bha bad ha kane ka kynti ruh la lap ïa kajuh ka rukom pntrei ïa ka surok,” la ong shuh shuh u kyrwoh na ka seng.
“Kane ka la pynbitar shikatdei eh ïa ngi bad ka jingleh u kontraktor ka la long shaba palat khlem da pyrkhat shuh ïa ka hok jong ki paidbah,” ong u President ka JNC Western Zone.
Ka seng ka la maham jur ïa kane ka rukom pyntrei ïa ka surok bad ong ruh ba kan sa leh da kaba tyngeh lada ym lah ban pyntrei katkum ka jingangnud jong ki paidbah.