Ujor ka JNC ha ka CS Revenue & Disaster Management halor ka jingshim jaka na ka bynta ka company Shree Cement Ltd ha Daistong EJHD

Khliehriat, Nohprah 04: Ka Jaiñtia National Council (JNC–CEC), hapoh ka jingïalam jong u President, u bah Sambormi Lyngdoh, mynta ka sngi ka 04 tarik Naiwieng 2025 ka la buh da ka ujor sha ka Commissioner & Secretary ka Revenue and Disaster Management, ka kong Matsiewdor War Nongbri, bad dawa ban tuklar lem halor ka jingkynnoh ba ka don ka jingpynkheiñ aiñ khyndew da ka company Shree cement Ltd ha kaba ïadei bad ka jingthmu ban tei ïa ka M/S Shree Cement Integrated Plant ha shnong Daistong, East Jaiñtia Hills kumta ka seng.
Ka seng ka phah ruh ïa u kyrwoh sha ki paidbah ba ki kam kiba ka seng ka shim ïa ki synjam ki long kiba na ka bynta ka jingbha bad na ka bynta ki hok longtrai jong ki riewlum .
La ong ruh ba ka JNC kan nang ïai bteng ban buddien ïa ka jinglong jingman kiba katkum ka aiñ bad da kaba shai bad Ka jingïatylli ka long kaba donkam ban khanglad ïa ka jingpyndonkam be-aiñ ïa ka khyndew ka shyiap bad ki marpoh khyndew kiba na ka bynta ka bha ka miat ha ka imlang sahlang jong ki paidbah riew lum. .
Ha ka jingujor, ka JNC ka pynpaw ïa ki jingeh kiba khraw ha kaba ïadei bad ka jingpynkylla jaka beaiñ ïa ki jaka riewlum kaba long ka jingpynkheiñ ïa ka aiñ jong ka Meghalaya Transfer of Land Regulation Act, 1971.Katkum ka kaiphod jong ka EIA ki jaka jong ka projek ka dei ka jong uwei u trai jaka riewlum, u ba kyrteng u Syrpaibha Sukhlaiñ ha kaba la thied pat da u Bharat Sharma, u bym dei u jaitbynriew riewlum kumta kane ka jingaiti ka sei ka jingpynkheiñ ïa ka kyndon ne Section 2 jong ka Meghalaya Transfer of Land (Regulation) Act, 1971, kaba khanglad ban aiti ïa ki jaka jong ki riewlum sha kiwei pat ki bym dei ki riewlum lada khlem ka jingthoh ne khlem kano kano ka jingbit na u Deputy Commissioner bad ïa kane ym shym la ai ha ka jingbit jong ka EIA.
Shuh shuh ka JNC ka la lap ruh katto katne ki jingduna kiba kongsan ba kynthup ka jinglong aiñ jong ka khyndew kam shym la pynshisha.
Ka seng ka sngewkhia ïa ka jingkam ka EIA ba la “thied” ïa ka jaka na ka bynta ka company Shree Cement Ltd, hynrei ym don pat kano kano ka jingioh jingbit kaba kat kum ki kot ki sla na u DC, ym don jingthoh shaphang ka jingkylla dur, bad ym don ruh kano kano ka jingmynjur na ka Jaiñtia Hills Autonomous District Council bad ruh ym don kano kano ka jingpynshisha ïa ka jingpynkylla jaka kaba katkum ka aiñ jong ki riewlum haba die jaka sha ki bym dei ki riewlum.
“Ki jingpynkheiñ ïa ki jaka khlaw (wildlife), Ka EIA ka kam ba ka projek ka don 6.35 km na ka khlaw ba la buh kyrpang ha Saipung hynrei kam shym la aiti pat ïa ka kaiphod kaba ki ong ka clearance.
Ka EIA ka kdew ïa ka shithi jong u DFO (08.10.25), hynrei ka shithi pat khlem suh lang, kane ka pyntlot ïa ka jingshaniah ha kaba iadei bad katei ka projek. Ka seng ka pynpaw ba kane ka long kum kaba la shu kyntait noh ïa ka bor synshar jong ka JHADC.
“Ka EIA ka ong ruh ba ka jaka ka don ha ka Elaka Nongkhlieh Doloiship, hynrei sngew lyngngoh pat ba ym don NOC na ka JHADC, ym don ruh kano kano ka jingpynshisha na u Doloi ka elaka. ym don kot, yn don sla kum ka jingmynjur na ka Dorbar Shnong , kane ka dei bad ka paw shai kum ka jingpynkheiñ im-im, peit-peit ïa ka Sixth Schedule” ong u kyrwoh na ka seng.
Na ka liang ka Jaiñtia National Council ka la kyrpad ïa ka Commissioner Secretary ba kan sngewbha ban shim khia ban leh mardor ïa ka kam ba donkam kata ban pynlong ïa ka jingtohkit ïa ka jingpynkylla jaka na ki riewlum sha ki bym dei ki riewlum, ban pynshisha la ka jingmynjur jong u DC ka don ne em, ban peit ïa ka jingmynjur jong ka JHADC, ki jingthoh jong ka jingkylla dur, bad ka jinglong trai kiba katkum ka aiñ, ban pynbna ba ka jingkhaiï jaka ka long kaba be-aiñ”
Ka seng ka dawa jur ba dei ban pynsangeh noh mardor ïa ka jingpynsngew paidbah ne ka public hearing kaba thmu ban pynlong mynta u bnai nohprah 2025 ha shnong Daistong, ka kyntu ruh ban buddien na u DC EJHD bad na ka JHADC na ka bynta ka jingbud ryntih kaba katkum ka aiñ, ka seng ka kyntu shuh shuh ïa ka Commissioner ban sdang ïa ki jingtohkit kaba da ka aiñ lada la pynshisha ïa ki jingpynkheiñ aiñ .
Haka ba iadei bad katei ka kam ka JNC ka la dep ruh ban buh haduh lai tylli ki shithi ba kynthup ka shithi ba la buh ha u Deputy commissioner, ka East Jaiñtia Hills District kaba halor ka jingujor kaba pura kaba pynpaw ïa ka jingpynkylla jaka beaiñ bad jingkyrpad ban pynsangeh noh ïa ka jingpynsngew paidbah, ka jingkyrpad ban pynshisha katkum ka aiñ kaba dei ka aiñ jong ka Meghalaya Land Transfer Regulation Act 1971, kawei pat ka dei ka shithi ba la buh hakhmat ka heh sorkar jong ka tnat khlaw (DFO wildlife Jowai) ha kaba ka seng ka la kyntu bad dawa ban pynshai kham kloi halor ka shithi sha ka DFO (08.10.25) ba la kdew ha ka EIA la ka la dep pynlong ne em ïa ka jingpeit bniah ïa ka jaka, ki NOC jong kiba na ka tnad Khlaw bad ka jingshah ktah ïa ka khlaw ba la buh kyrpang ha Saipung (6.35 km)
Ha kaba iadei bad ka shithi sha u CEM ka JHADC pat ka JNC ka la pan ïa ka jingpynshai halor ka jingthied jaka ki briew ki bym dei ki jaitbynriew riewlum, ka jingbym don ka NOC na ka JHADC bad ka jinglong trai jaka hapoh ka Elaka Nongkhlieh Doloiship .
U president ka JNC u bah Sambormi Lyngdoh haba kren halor kitei ki mat, u la ong “Ka JNC kan ym shah ïa kano kano ka jingpynkheiñ ïa ka hok khyndew jong ki riewlum, ngi la leh stet bad pynkloi ïa kane ka kam bad da ka jingkitkhlieh da kaba ujor da kitei ki lai tylli ki shithi ba thikna bad kawei ruh ka jingujor kaba mynta ka sngi ba la buh hakhmat ka Commissioner & Secretary ka Revenue and Disaster Management, ka kong Matsiewdor War Nongbri bad ka seng kan bud dien haduh ba ka Sorkar kan da pynthikna ïa ka jinglong aiñ jong ka jingpynkylla jaka,”