Nongstoiñ, K’lyngkot 08: Ka HYC Lai Lyngdoh Circle hapoh ka jingïalam u President samla Wandap Marweiñ bad General Secretary samla Willbirthsoon Kharsyiemlieh, ha ka sngi palei ka la leit ïakynduh ïa ka Deputy Commissioner ka Smt Hema Nayak IAS, halor ka jingdon ki trok kiba ïaid bad kiba kit palat pud ki lyngba ka surok Nongkhlaw-Nongkasen, kaba ap jingma ïa ki jingkieng kiba don ha shilynter katei ka surok khamtam ïa ka jingkieng Mawthungkper bad Mawkaton.
U President haba kren sha ki lad pathai khubor, u la ong ba ka jingïaid jong kine ki trok ka ap jingma khamtam ïa ka jingkieng Mawthungper bad jingkieng Mawkaton, kiba ka jinglong jingman jong ki jingkieng ka la sator bha.
U la kyrpad ruh ïa ki kali ba kim dei kit palat haba ïaid lyngba katei ka surok, namar kan sa ktah ha ka leit ka wan jong ki paidbah hadien habud.
Na ka liang ka madam DC ka la kren shai ba kan sa shimkhia halor kane ka bynta, ha kaba ka la ong ruh ba kan sa ïakynduh ïa u Superintendent of Police jong ka West Khasi Hills. Ha ka juh ka por kan sa ïakynduh ïa u Executive Engineer jong ka PWD ban ïakren ban sanction thymmai noh ïa kitei ki jingkieng.
