Jowai, Rymphang 01: Ka Hynñiewtrep National Youth Front (HNYF), Jaiñtia Hills District, mynta ka sngi 2 tarik u Rymphang hapoh ka jingïalam jong u samla u Tyrchain Shylla, Secretary HNYF Jaiñtia Hills District, kala leit ban buh da ka jingujor haka ophis jong u Assistant Executive Engineer (AEE), KTD (S) Sub-Division, MEPDCL, Khliehtyrchi, halor ka jingbym shim khia jong katei ka tnad ban peit pyrthuh ïaka jingma kaba la ap ïa ki nongshong shnong bad ïa ki jingri jingduk ha shnong Sanaro na uwei u Transformer.
Ka seng ka pynpaw ba uwei u Transformer uba dang pyndonkam ha katei ka shnong ula ïeng khlem kano kano ka jingker, fencing ne ki lad jingïada kiba dei ban don. Kane ka long ka jingma kaba jur bha, ym tang ïa ki paidbah hynrei wat ïa ki khynnah, ki jingri jingduk bad ïa ka shnong hi baroh kawei.
Katkum ka jingjurip ba la leh da ka seng, la lap ba utei u Transformer um shem la don kano kano ka jingthoh maham (Warning/Danger Signboard) ne ki lad jingïada kiba dei ban leh da ka ophis jong ka MEPDCL, kaba lah ban wanrah ïa kino kino ki jingjia ba sngewsih ha ka lawei.
Mynta ka sngi na ka liang ka seng kala buh da ka jingthoh ban dawa ïa ka MEPDCL ba kan shim khia mardor ban pynshna noh ïa ka jingker ne fencing bad ban buh ïa ki dak maham (Danger/Warning Signboard) ban lait na kino kino ki jingjia ba sngewsih.
Kum ban pynkynmaw, ka seng kala dep ruh ban ai jingthoh halor utei u Transformer naduh ki snem kiba la leit, hynrei haduh mynta na ka liang ka ophis ka khlem pat shim kano kano ka sienjam kaba dei.
Ha kane ka kynti, lada ka ophis jong ka MEPDCL kam shimkhia ne kam leh ei ei ban pynbeit ïa kane ka jingeh, na ka liang ka seng kan shim noh da kiwei pat ki lad jingïakhun kiba kham tyngeh ban jingïada ïa ka ïap ka im bad ka jingshngaiñ jong ki paidbah.
