Shillong, Lber, 07: Ka Hynñiewtrep Integrated Territorial Organisation (HITO) Central Body bad Sohra Circle ha ka sngi Thohdieng ka la ujor sha u Executive Member ka Khasi Hills Autonomous District Council (KHADC) uba khmih ïa ka tnat Trade Bah Winston Tony Lyngdoh pyrshah ïa ki nongkhaii mawshun bar jylla ki bym don ïa ka Trading License.
“Ka la don ka jingkiew kaba paw ha ka jingshalan ïa u mawshun sha ki bynta bapher bapher jong ka ri Bangladesh, kaba kynthup lang ïa ki riewshimet Khasi bad ki nongkhaii bym dei trai jylla. Kane ka kam ka hap beit hapoh ka jingpeit jong ka KHADC, kaba la shaniah ban ïada ïa ki hok trai ri jong ka jaidbynriew jong ngi,” ong ka seng ha ka jingujor ba la soi da u President ka Central Body Bah Donbok Dkhar bad u President ka Sohra Circle u Bah Comet Lyngdoh.
“Ngi aiti ïa kane ka jingujor ban kyrpad ïa ka ophis jong phi ban leh da kaba tyngeh ïa ki nongkhaii mawshun bar jylla kiba treikam khlem ki laisen khaii bad ki bym bud ïa ki kyndon ba la buh da ka KHADC. Baroh ki nongkhaii bar jylla ki dei ban da ïoh shwa ïa ka laisen khaii kaba biang na ka KHADC katkum ki kyndon jong ka aiñ,” la pynpaw ka seng ha ka jingujor.
Ka HITO ka la kyrad ïa ka KHADC ban pynlong ïa ka jingjurip ïa baroh ki trok kiba kit ïa u mawshun ban pynpoi sha ka ri Bangladesh khnnag ban pynthikna ba kan don ka jingbud ryntih ïa ki kyndon laisen khaii.
“Ngi kyrshan ban pynsangeh noh ïa kino kino ki jingai laisen khaii thymmai kiba la ai sha ki riewshimet bar jylla khamtam lada ki samla Khasi trai ri jong ngi ki la lah ban pynïaid ïa kine ki kam khaii,” la pynpaw ka seng.
