Shillong, Naitung, 29: Ka Federation of Khasi Jaiñtia and Garo Peoples (FKJGP) ha ka sngi Thohdieng ka la ujor sha ka Deputy Commissioner jong ka East Khasi Hills District ka Kong Isawanda Laloo ban pyntip ba bun na ki Agency ba ju pynpoi ïa u tyndong lyer shet jingshet ne Domestic LGP Cylinder ki la ohdor tam na ka dor ba la buh da ka Indian Oil Company bad bun ki paidbah ki la pyntip sha ka seng ban tuklar lem halor kane.
“Ngi kyrpad ïa phi ban phah ïa ki Ophisar ban tohkit halor kane ka kam bad lada lap ba ka long kaba shisha, ki bor synshar District ki dei ban pynshitom ïa ki Dealer. Lada ka ophis jong phi kam shimkhia, ngim don lad shuh da kumwei pat hynrei ka seng kan sa leh hi la ka jong ka kamram da kaba pynlong ïa ka jingkhynra,” ong u kyrwoh ba la phah da u Asst. General Secretary ka FKJGP Central Body u Bah Reginald Thabah.
“Namarkata ngi kyrpad ïa ka ophis jong phi ban pyntip halor ka dor jong u tyndong lyer shet jingshet manla u bnai lyngba ki lad pathai khubor khnang ba ki paidbah kin dup tip ïa ka dor ba thikna jong u tyndong lyer shet,” la ong ka seng.
