Ujor ka Directorate of Enforcement (ED) da ka SPC pyrshah ïa 13 ngut ki briew halor ka kam thok pisa ba palat `395 klur tyngka

Shillong, K’Lyngkot 17: Ka Directorate of Enforcement (ED), Shillong Sub Zonal Office, kala ujor da ka Supplementary Prosecution Complaint ha ka 16 tarik mynta u bnai pyrshah ïa ki 13 ngut ki briew kiba shah kynnoh ha kaba ïadei bad ka case Pearlvine International hapoh ka Prevention of Money Laundering Act (PMLA), 2002.
Ha ka jingujor ka kynnoh ba ki riew shimet kiba shah kynnoh ki donkti ha ka scheme Ponzi kaba heh bha, kaba thok ïa ki nongbei tyngka kaba ym duna shuh ïa ka `395.35 klur.
Ki tyllong khubor ki ïathuh ba ka ED ka la sdang ïa ka jingtohkit katkum ka jingujor ejahar ba la kyntiew ha ka bui da ka CID, ki pulit ka Meghalaya da kaba pynshong nongrim ha ka jingujor jong ka RBI, Shillong bad ka Charge Sheet hapoh ki kyndon bapher bapher jong ka IPC, 1860 pyrshah ïa ki briew kiba donkti ha ka jyrsieh ponzi ba la pynlong ha ka kyrteng jong ka Pearlvine International, ba la pyntreikam lyngba ka website www.com.com.Ka la lum haduh `2,250 kum ka bai dkhot bad ka la pynïaid ïa ka scheme panzi kaba thok ha India ha ka por ba ka trei kam kata ha u snem 2018 haduh u bnai Lber 2023.
Ha katei ka por, la pynlong ïa ki seminar ha kylleng ka ri ban ïoh ïa ki dkhot bad ban pynpaw pyrthei ïa ki jingmyntoi jong ka.Ha kawei ka por ha u snem 2022, ka Pearlvine International ka la kam ba ki don ki dkhot haduh 80 lak ngut ha India bad shabar ri.Ha ka jingtohkit la lap ba ka PoC baroh kaba la lum ha ka kyrteng jong ka Pearlvine International (www.pearlvine.com) ka long `1,575 Klur bad ym duna ïa ka `395.35 klur kiba la shah thok.
Ha ka Supplementary Prosecution Complaint ba la ujor da ka ED ka la kynnoh ba uwei u Parvesh Saroha u la buh ïa ka website www.pearlvine.com. La kynnoh ruh ba u Neeraj Kumar Gupta u dei u briew uba plan bad u la thied ïakatei ka website domain ba la kdew ha u bnai Naiwieng 2015 bad u la pynlong ruh ïa ki katto katne ki seminar jong ka Pearlvine International ha India bad kumjuh ruh ha Thailand na ka bynta ban kyntiew ïa ka ponzi scheme.
Shuh shuh ki tyllong khubor ki la pyntip ba ka ED ka la dep ban mudui da ka Main Prosecution Complaint ha ka 23.10.2024, ha kaba u Parvesh Saroha ryngkat bad u Sony Chyrmang bad u Khroborme Chyrmang kiba la lap ba ki ïaleh ban kyntiew ïakatei ka skhim Ponzi ha ka Jylla Meghalaya, la pynngat ïa ki kum ki briew ba shah kynnoh.Ka mukotduma ka dang don ha ka jingbishar.
Ka jingpynngat baroh kaba la leh da u ED ha kane ka case haduh mynta ka long `54.98 Klur.Ka jingtohkit kaba kham bniah ka dang ïaid shakhmat.