Shillong, Naiwieng 10: Ka seng ACHIK lyngba ka kyrwoh khubor ka la ong ba ka la phah da ka jingujor sha u Additional Chief Engineer ka tnad PHE kaba don ha Tura bad ka la kynnoh ba la don ka jingpyntrei kam torti ïa ka skhim JJM ha ka shnong Dichinggre.
Halor kane na ka liang ka seng ACHIK ha ka shithi kaba la phah sha u Additional Chief Engineer ka la kynnoh ba ka jingtreikam kam long satia kaba i hun bad ka la kyntu ïa ka tnat sam umbam umdih ba kan leh eiei katba lah ban pynbeit ïa kane khnang ba ki paidbah kin ïoh ïa ka jingmyntoi.
Ha kajuh ka por ka seng ka la kyntu ba kano kano ka jingtreikam ka dei ban long kaba biang ba ki paidbah kin ïoh ïa ka jingshaniah na ka sorkar namar ka skhim JJM ka long ban pynïoh ïa ka umbam umdih kaba biang sha ki paidbah jong ki shnong bapher bapher.
Ka seng ACHIK ka la kyntu ïa u Additional CE ban tuklar lem ïa kane ka kam na ka bynta ka jingbha jingmiat jong ki paidbah bad ba kan long ka jingmyntoi ïa ki nongshong shnong jong ka Dichingre na kane ka skhim JJM.
Ïa ka shithi la soi da u Kebil A Sangma Co-Chairman North Garo Hills, Kronosh B Sangma President ka Dadenggre Regional Unit bad u Akber M Marak General Secretary Dadenggre Regional Unit.
