Shillong, Nailur 23: U Tengba Marak u nongshong shnong ka South Garo Hills u la ujor da ka ejahar First Information Report (FIR) pyrshah ïa u contractor ka Gare Songmong JJM, ki ophisar ka Public Health Engineering (PHE) department ha Williamnagar, bad ïa u third-party inspector halor ka jingkynnoh ba ki la bamsap bad pyndonkam bakla ha kaba pyntreikam ïa ka Jal Jeevan Mission (JJM) project ha Gare Songmong bad ha ki thaiñ ba marjan.
“Namar kata nga kyrpad ïaphi ban register ïa kane ka FIR pyrshah ïa kitei ki briew kiba la shah kynnoh, ban pynlong ka jingtohkit kaba bniah bad ban shim da kaba tyngeh katkum ki kyndon jong ka aiñ,” ong u Tengba Marak, u nongshong shnong ka Gare Songmong kaba ha South Garo Hills district ha ka FIR ba la ujor hapojh ka Nongalbibra police station ha ka sngi baar.
U Marak u la kynnoh, “Hapoh ka flagship scheme jong ka sorkar ka Jal Jeevan Mission (JJM), kaba dei ka projek ban pynbiang ïa ka umbam umdih la dep ban mang bad pyntreikam na ka bynta ki nongshong shnong ka Gare Songmong bad ki thaiñ ba marjan. Hynrei utei u contractor, da ka jingïatreilang bad ki ophisar ka tnat PHE Williamnagar bad u third-party inspector, ki la donkti ïa ka jingbam sap kaba jur bha bad ka jingpyndonkam bakla da kaba pyntrei ïa kane ka project da kaba shu trei tang dep rukom bad kaba hiar dor bha.”
U la kynnoh ruh ba ki pipeline kiba la siang ki dei kiba pohdor, ka jingtei ka bym ïahab bad bun bha na ki longïing ki dang ap khmih lynti ban ïoh ïa ka um sha manla ki ïing wat hadien ba la ai ïa ki syrnot ba la pyndep ïa ka kam bad ba ka pisa ba la mang da ka sorkar la pyndonkam bakla bad ka jingpyntreikam ïa kane ka project ka don tang ha ki kot ki sla hynrei ha ka jingshisha pat ki paidbah ki la shah ïeh beiñ bad duh ïa ki hok ban ïoh ïa ka umbam umdih kaba pahuh.
Suki suki, u Marak u la kdew ba ki tank kiba la dep tei ki la shu shah ieh khlem don um hynrei ki la dap tang da ka ktieh bad khyndew bad dap da ki phlang kiba la mih khlem da wan tuid satia ka um wat hadien shi taïew ba la pyndep ïa kane ka projek.
“Ïa ki jingsoi kyrteng la dep shim da ki nongshong shnong ban sei ïa ka pisa da kaba leh thok khlem da ïaid katkum ki rukom treikam bad ki jingpynsngewthuh,” u la kynnoh shuh da kaba pynshai ruh ba kane ka pyni shai ba ka don ka jingthmu ban bam sap, ban thok, ka kam runar, ka jingpyndonkam bakla ïa ka pisa ki paidbah da u contractor, ki ophisar ka tnat bad u third-party inspector, kaba dei ban pynshitom katkum ki aiñ.”
