Shillong, Naitung 06: Kawei ka longkmie ha ka sngi Balang ka la ujor da ka ejahar ha ki Pulit jong ka Rynjah Police Station pyrshah ïa uwei u bar jylla da kaba kynnoh ba u la pyrshang ban jrong kti ïa ka katba ki dang ïa shong lang ha ka kali kamai ban leit sha Rynjah.
Katkum ka jingtip ba la ïoh na ki Pulit, la ïathuh ba kane ka longkmie ryngkat bad kawei ka khun kynthei jong ka, ki ïa shong lang mar syndah bad une u bar jylla ha ka seat kaba shadien bad ha ka jingkhapngiah kaba la pynlong lypa ban ïatyngkhuh para met kat haduh ba kane ka longkmie ka la sngew smiej met ïa ka rukom peit bad ka rukom leh jong une u bar jylla, kumta ka la lynniar briew noh hangta.
Katkum ka jingtip na ki Pulit jong ka Rynjah Police Station, la ong ba kane ka longkmie ka la ujor pyrshah ïa une u bar jylla namarba ka la suba sniew ïa ka jingleh jong u watla um pat shym la jrong kti eiei ïa ka.
Ha kaba ïadei bad kane ka jingjia, ki pulit ki la rah ïa une u bar jylla sha thanat na ka bynta ban pynlong ïa ka jingtohkit kaba bniah bad pyngat ïa u hapoh ka kyndon 354 jong ka Indian Penal Code (IPC).
