Ujor Ejahar ka HITO ïa ka Sonapur Weight Bridge bad ïaka Ratacherra forest beat office

Jowai, Naitung 07: Ka Hynñiewtrep Integrated Territorial Organisation (HITO) hadein bala ïohïiaka jubab lyngba ka aiñ wat jingtip ka Right to information act 2005, la lap ba ka Jaiñtia Hills Autonomous District Council kam shem la ai jingbit ban pynïaid ïa kitei ki khyrdop katkum ka RTI bala ïoh naka office u Chief Forest Officer JHADC Jowai.
Ka seng kala buh ïa kane jingujor hadein bala ïoh shibun ki jingujor naki paidbah ba kitei ki khyrdop kiba la pyndonkam haka kyrteng ka JHADC Forest Department kila shu shim tang ka Pisa naki kali kit marpoh khyndew bad kit markhlaw khlem da ai ïaki reciept kiba biang bad khlem ka jingsoi ki officer ka JHADC.
Naka liang ki nongïalam ka seng kila pyrshang ban kylli ïaki nongtrei kiba don ha kitei ki khyrdop kila jubab da kaba ong ba kine ki khyrdop ki dei kiba la pynïaid da u wei u briew uba la tip kyrteng kum u Sevenborn Tang u nong shimwai jong kitei ki khyrdop hynrei khlem don pat ki kit ki sla ban pynshisha ba ka JHADC Forest Department kala ai jingbit ïa u ban Pynïaid bad sa kawei ruh kim shem la ïoh NoC ne jingbit naka Ministry of Road Transport and Highway ne ka National Highway Authority of India bad State PWD Department.
Dei halor kane ka nongrim ka seng kala shim ïaka kane ka sein jam ban Ujor syndon daka ejahar pyrshah ïakitei ki artylli ki khyrdop kiba don ha East Jaiñtia Hills District haka office jong u Superintendent of Police Khliehriat.