Khliehriat nailar 28: Ka Hynñiewtrep Achik National Movement Jaiñtia Zone, mynta ka sngi ka la ujor da ka ejahar ha Lumshnong Police Station ïa ki ar ngut ki briew kiba trei ha company Topcem, kiba dei kiba na bar jylla ba la tip kyrteng kum u Arun Kejeriwal bad uwei pat, kiba la kren da ki ktien khlemakor bad kren pynshit myn ha ka 24 tarik mynta u bnai ha ka por ba don ka jingiakhih paidbah hapoh ka public hearing ba pynlong ha Thangskai.
Katkum ka ujor ba la buh da u President HANM Jaiñtia Zone, u bah Shaniahlang Suchen la ong ba katkum ba paw lyngba ki pathai khubor la iohi ba kitei ki bar jylla kiba trei ha ka company Topcem ki la kren pynshit bad kren ruh da ki ktien sih, ktien khlemakor, kumta ka seng ka la kyntu ïa ki bor jong ka aiñ ba kin shim khia ïa kane bad ban leh ïa kaba donkam kaba katkum ka aiñ, ban tohkit ruh halor ka jingleh kitei ki nongtrei jong katei ka company ban pynngat ruh ïa ki ha ki kyndon aiñ.
Ha kane kajuh ka sngi, ka HANM Jaiñtia Zone, ka la leit ruh ban buh da ka jingthoh ha khmat u President jong ka Meghalaya Cement Ltd Thangskai bad dawa ba dei ban beh kam noh shi syndon ïa kitei ki nongtrei kiba la kren khlemakor bad pynshit ha ka jingiakhi myn ha ka 24 tarik, khnang ban dup lah ban pynneh ïa ka shong suk shong saiñ hapoh ka thaiñ bad ha ka district baroh kawei.
Ka seng ka la ong ruh ba lada ka company lam lah ban leh ïa kane ka jingdawa ka seng kan sa ieng ban pyrshah bad kan nym kitkhlieh ruh lada jia kaei kaei ka ban mih, kumta ka seng ka bthah ïa ka MCL ba kan pynkloi ban beh kam ïa ki mardor ïa kitei ki ar ngut ki nongtrei.
