Jowai, Naitung 09: Ki paidbah nongshong ka Moodop-Pambhoi West Jaiñtia Hills ha ryngkat ki dkhot ka JSM Nartiang Circle mynta ka sngi ki la pynsngew ïa ka jingud jingnam jong ki, halor ka rukom pyntrei ïa ka surok Moodop-Pambhoi (Internal Road) ban rung shapoh ka shnong.
Hadien bala dep pyntrei ïa katei ka surok la kumba 5 bnai eiei mynta hynrei ka surok kaba la dap sa tang ka ktieh suda bad kane ka la shem shitom ïa ki paidbah ban ïaid lyngba khamtam ha kum kane ka por slap.
Kitei ki nongshong shnong ula pynpaw ba u Contract ula dep pyntrei ïa kane ka surok lyngba ka skim jong ka sorkar kmie, hynrei ka jinglong jingman jong ka surok kam long shuh kaba biang ban ïaid lynti bad kane ka long kumba pyntrei tangdep ïa ka surok tang ban ïoh nong.
Halor kane ki la kyrpad jur ïa ka tnad PWD bad ïa u Contractor ban pynbha noh kloi ïa kane ka surok, da kaba ong halor kano ka nongrim la pyntrei ïa kane ka rukom shna surok kaba la buh pynbha ha ka jingeh ïa ki paidbah kiba ïaid lynti wat ïa ki kali kumjuh, da kaba ong “haba trei ïa ka kam dei ban leh da kaba bha”.
Ha ka juh ka por la dawa na ka tnad PWD ba kan weng noh ïa ki post dewbilat kiba don hapeng surok hashwa ban rung shapoh shnong namar kane ka pynjingjar shibun eh ïa ki ka la heh.
