Ud ki nongñiah kali, kyrpad ban nym pynthud ïaka leit ka wan

Nongpoh, Naiwieng 25: Hadien ka jingkhang jong ki pulit Assam ïaki kali kamai ban kiew shaka jylla Meghalaya, ka Jorabat mynta kala long kum ka jaka kiew bad pynhiar passenger ha kaba da ki phew tylli ki kali kamai Tourist kila pynlong kum ka jaka ïeng ha katei ka jaka.
Naka liang ki nongñiah kali naka jylla Meghalaya bad Assam ki don ruh ka jingïatreilang kaba jan ban nym ktah ïaka kamai kajih jong ki ha kaba baroh ki nongleit nongwan na Shillong kiba thmu ban leit sha Guwahati kin pynhiar tang ha Jorabat bad nangtei pat yn sa shimti da ki kali ba na Assam tang ban ioh kamai lang hadien ba kim iohlad shuh ban kiew sha Meghalaya.
La sakhi ruh ba da ki phew tylli ki kali naka jylla Assam bad Meghalaya kila ïeng lain ha katei ka jaka ban shimti bad kyntiew bad pynhiar ïaki nongleit nongwan tang ban pynpoi suk ïaki sha ka jaka ba kidei ban leit watla kala ktah ïaki nongleit nongwan namar ba ki hap ban shim rem ïaka bai kali.
Naka liang ki katto katne ngut ki nongñiah kali kila kyrpad sha ka sorkar ba ka dei ban pynbeit noh kham kloi ïa kane ka kynrum kynram halor ka jingjia ha Mukroh ba kum ki nongñiah kali ki dap da ka jingsngewkhia, hynrei ym dei pat ban pynheh lane pynshit ïa kane ka jingjia kaba ktah ïaki nongleit nongwan, ym da ka jingïa umsnam khamtam ki nongñiah kali namar ka jinghuri hura ka dei da kawei ka bynta balei pat ban ktah ïaki nongleit nongwan, ki nongñiah kali kamai haduh ba kim shlan shuh ban kiew sha Meghalaya.
Kila pynpaw ruh katei ka jingjia ka dei da kawei ka bynta bad ki briew haka jylla Meghalaya ki dei ban sngewthuh shai ba kim dei ban ktah kti lane ban shoh ban dat ïaki nongñiah kali bad ki nongleit nongwan kumba ki briew jong ngi ruh ki donkam ban leit ban wan sha Assam ban don ka jingsngewthuh jingmut lang ban nym mih kano kano ka jingïapher jingmut bad ka huri hura.