Khliehriat, Naiwieng 06 : Ka Jaiñtia Hills Cement Manufacturing Association (JHCMA) ka la ud ba ka la don ka jingthut kaba jur bha ha ka jingkit ia ka dewbilat bad clinker na Meghalaya kaba la sahkut noh naduh ka 27 tarik Risaw namar ka jingiakhih ba la khot da ka Meghalaya Commercial Truck Owners Association (MCTOA).
Katkum ka kyrwoh, ka seng ka la ong ruh ba kane ka jingiakhih ka la pynthut bad ktah jur ïa ki jingpynpoi mar na baroh ki karkhana dewbilat ba kongsan na Jaiñtia Hills, kaba la wanrah ïa ka jingduna dewbilat kaba jur ha kylleng ka jylla Meghalaya bad ha baroh ki jylla ka thaiñ Shatei Lammihngi.
Ïa kane ka jingiakhih la khot pynlong da ka seng kaba dang shu thaw thymmai ka MCTOA, kaba dawa ba dei ban ai ïa ki dor kit ba la pynbna da ka sorkar jylla shabar jong ka jylla Meghalaya, la ong ruh ba kane ka jingdawa ka long ka bym shong aiñ, namar ka jingpynbeit ïa ka jingkit mar na ka bynta ka jingleit jingwan hapdeng ki jylla ka hap hapoh ka jingpeit jong ka sorkar Pdeng katkum ka Riti Synshar jong ka Ri India, ong u kyrwoh.
Shuh shuh la ong ba ia ki dor bai kit bai bah hapoh ka Jylla la dep pyntreikam pura da kaba bud ryntih ïa ki jingpynbna jong ka Sorkar Meghalaya ha ka 5 bad 17 tarik u Naiwieng 2020. Ia kine ki dor la bud da baroh ki karkhana pynmih dewbilat lyngba ki ar tylli ki seng ba la ithuh, kata ka Jaiñtia Hills Truck Owners Association (JHTOA) bad ka East Jaiñtia Hills Truck Owners Association (EJHTOA) ban pynthikna ïa ka jingtreikam kaba iaid beit iaid ryntih ha kine ki snem ba la leit noh.
“Kane ka jingkhanglad kaba dang ïaid shakhmat ka la pynsangeh ïa ka jingpynpoi mar bad ktah jur ïa ki kam tei jingtei ha ka thaiñ baroh kawei.
Baroh ki karkhana dewbilat ki la khang khyrdep mynta la bun sngi, ngi la kyntu ïa ka jingtuklar lem ba mardor jong ki bor synshar khnang ban lah ban bteng ïa ka jingpynpoi mar bad na ka bynta ka jingshngaiñ jong ki trok kit mar bad ban iada na ka jingpynthut ïa ka ioh ka kot ba iadei bad ki kam karkhana bad ki kam pynroi,” bynrap shuh shuh ka JHCMA ha ka kyrwoh.
