Ka jingshimkhia bad ka jingmih shakhmat ka Shillong Traffic Police ban hikai bad pynsnewthuh ïa ki nongniah kali ïa u Zebra Crossing ha kaba nyngkong eh kan ïarap pat ïa ki paidbah ban jam da kaba suk na shiliang sha shiliang surok khlem kano kano ka jingsheptieng.
Ka jingkylli ka long balei ki Pulit Pynïaid Kali ha nongbah Shillong kaba long ka Headquarter jong ka Jylla kim lah ban leh eiei ïa kane ka jingma kaba ap ïa ki paidbah nongïaid lynti naduh ki snem ba la leit noh katba ki kyndit thiah pat ynda la tied u tyrnem jong ka Iingbishar High Court ka Jylla. Kane ka pyni shai ba ka tnat Pulit kam suidniew ïa ka jingim jong ki paidbah nongïaid lynti khamtam ki khynnah skul kiba ju jam na shiliang sha shiliang surok shwa ban leit sha skul bad ynda la wai skul.
Ka jingbym shimkhia jong ka tnat Pulit naduh ki snem baladep la buh jingeh bha ïa ki paidbah nongïaid lynti ban jam na shiliang sha shiliang surok khamtam wat haba ïaid lyngba u Zebra Crossing namar ka jingpynher stet shaba palat ki kali kat haduh ba ki nongïaid lynti ki hap ban ïaid syier mynsiem bad phikir bha ïoh jia kano kano ka jingjia ba sngewsih.
La ju lap ruh ba ki kali ym tang jong ki riewshimet, ki kali kamai lane ki kali Sorkar kiba ju suh kum u khnam bad kiba ju leh bym lap lieng khlem da ailad shuh ïa ki paidbah ban jam na shiliang sha shiliang surok. Kum kine ki jingjia ki buh jingma haduh katta katta ki khynnah skul. Donbok ba ka sor Shillong ka dei ka shnong kaba ka jingdheng kali ka jur bha na ka jingkharoi kaba manla ka sngi kumta ki jingmynsaw jong ki paidbah nongïaid lynti haba jam na shiliang sha shiliang surok kam da jia kynrei than namar ha ki kynta ba jur ka dheng kali ki kali kin hap ban ïaid kum ka mattah.
Ka jingbym don ki jingkieng suiñ ban ïaid ki paidbah ba pynïasoh na shiliang sha shiliang surok kum ka jingkieng dewbilat ha Dhankheti, ka buh jingma bha khamtam ha ka por mynmiet ïa ki paidbah nongïaid lynti kiba thmu ban jam na shiliang sha shiliang surok namar ka jingpynher stet ki kali ka pynsyier mynsiem haduh katta katta ïa ki paidbah.
Ha kawei pat ka liang, ka jingshimkhia jong ka Shillong Traffic Police bad ki Pulit ka East Khasi Hills District na ka por sha ka por ban ai jinghikai ïa ki paidbah ban ithuh ïa u Zebra Crossing kan ïarap shikatdei eh namar kan jin la pynduna ruh ïa ka jingpynher stet ïa ki kali bad kan ym wanrah ruh ïa kano kano ka jingjia basngewsih ïa ki nongïaid lynti.
Lehse ka jingïarap jong ki Pulit pynïaid kali ryngkat ka jingïatreilang bad ki samla pule na ki Kolej bapher bapher ka sor Shillong ban pynsngewthuh ïa ki paidbah bad ïa ki kmie ki kpa halor ki bynta bakongsan jong u Zebra Crossing ne u Laiñ ba la dro lieh hapdeng surok kan ïarap ruh ïa ki khynnah skul ban pyni dak kumno ban pynsangeh ïa ka kali haba ki ïaid lyngba une u Zebra Crossing.
Ym lah ban len kiba bun ki paidbah ki bym pat tip ïa une u laiñ Zebra Crossing ym tang ha sor hynrei wat sha ki jaka nongkyndong bad kane ka buh jingeh bha ïa ki nongniah kali bad wat ïa ki pulit ban pynsngewthuh ïa ki paidbah.
Ka tnat Pulit pynïaid kali jong ka nongbah Shillong ka la dei ban leit ruh sha ki skul bapher bapher ka East Khasi Hills District bad sha ki shnong ki thaw khnang ban ïarap pynsngewthuh ïa ki paidbah halor u Zebra Crossing uba ïada ïa ki haba ki jam na shiliang sha shiliang surok. Nalorkata, kan ym don jingmut pat lada yn shu ai jinghikai ïa ki paidbah ha surok khlem da don pat u Zebra Crossing.
Ym tang katta, ka Shillong Traffic Police ka la dei ban ïatreilang bad ki kynhun jong ki nongniah kali bapher bapher ka East Khasi Hills ban ai jinghikai halor ki Traffic Sign kiba lah ban pynsngewthuh ïa ki nongniah kali namarba la sakhi ba bun ki nongniah kali kim ju burom satia ïa ki Traffic Sign bad bun ruh imat kim tip ruh ïa ki kyndon aiñ jong ka Motor Vehicle Act, kaba teh kyndon ïa ki nongniah kali.
Ka jingdheng kali jong ka Sor Shillong ka dei hi na ka daw ba ki don ki nongniah kali ki bym suidñiew satia ïa ki kyndon aiñ ñiah kali kiba shu tur beit rak rak katba ki mon bad pyndheng ïa ki kali ha surok bad pynsyrtok ïa kiwei pat kiba bun nadien. Ka jingbym don ïa ka ‘Discipline’ ka dei ka daw kaba kongsan eh kaba wanrah ïa ka jingdheng kali ha surok na ka jingkhlem akor jong ki nongniah kali. Ym tang katta, ha kiba bun ki khep la lap ïa ki kali Sorkar kiba ïaid sahuh la kum ki syiem hapdeng surok wat hapdeng ka jingdheng ki kali. Kum ïa kine ki kali dei ban daiñ kuna da u paidbah da kaba ujor sha ki bor jong ka aiñ namarba ka tarajur jong ka aiñ kam ju thew shiliang ïano ïano ruh la ka dei ïa u shakri Sorkar lane ïa u paidbah.
