Shillong, Risaw 27: Ïa ka ïew tamasa Sohphlang kaba 2 ba la pynïaid da ka Mawkynrew Sohphlang Eco-Cultural Indigenous Society ka la poi noh sha kaba kut mynha ka 26 tarik u bnai Risaw 2024, ha Lad-Kharang Mawkynrew East khasi Hills.
Kane ka tamasa, da ka jingkyrshan ka tnad Basin bad ka Tourism, ka la wanrah ka jingshat jingmut ïa ki paid Mawkynrew ban sngewthuh.
Lah ban ong ba ka Mawkynrew ka dei ka jaka kaba don bun kiei kiei kiba donnam bad pawnam ha ka Mei Mariang, ki marrep mariang ka sap ka phong jong ki briew kiba im bad trei ïa ka kam pynim jakpoh.
Ha ka sngi kut jong ka ïew tamasa sohphlang ka MSECIS ka la pynïaid ïa ka jingpyni riam tynrai da ki jaiñ phong nongrep ha ryngkat ki tiar trei lyngkha.
Kane ka tamasa ba la pyninam ruh ïa kiwei ki mar rep kum u soh Shan (Strawberry), u Krai bad kiwei kiwei de ki jait jingbam ba pynmih hi da ki nongrep bad ki paidbah ka thaiñ Mawkynrew.
U MLA ka Mawkynrew u Bah Banteidor Lyngdoh u long u kongsan ban ai khusnam ïa ki nongjop ha ka jingriam nongrep bad ka jingïakob pyni riam tynrai bad u la ong ba kane kan ai mynsiem ïa ki khun samla bad ban kyntiew ïa ka Konstituensi.
“Ka jingpynïaid ïa u Sohphlang kam dei tang ka tamasa, hynrei ka jingthmu ka dei ban ïalam ïa ki nongrep ban shlur ban rep kham bun,” ïathuh u Bah Banteidor Lyngdoh.
U Bah Banteidor Lyngdoh u la ïathuh ba kito kiba bam Sohphlang kidei ban tip ba u wieh um don jaka ha ka met u briew.
La ong ba ka thong jong kane ka tamasa kadei ban kyntiew ïa ka kam thung ïa u Sohplang u ba dei ruh u jingbam tynrai jong ki paidbah ka thaiñ Rilum Khasi-Jaiñtia.
Na ka liang jongu ula khublei ïa ka kynhun ba kan pyntyllun hapoh Meghalaya ban pynlong ïa kane ka tamasa ban kyntiew ïa u Sohphlang ka ban nang pynshlur shuh shuh ïa ki nongrep ban rep ïa une u jait jingbam.
Na ka liang ka Mawkynrew Sohphlang ka Eco-Cultural Indigenous Society ka la ïoh ka jingkyrshan na ka Bethany Society Laitumkhrah da kaba ai ïa ka Society Sohphlang da ka Cold Storage bym donkam bording.
Ka Society Sohphlang mynta ka phaikhmat ban rah ïa u Sohphlang sha Nongbah Delhi. Shuh shuh katei ka kynhun Sohphlang ka phai khmat ïa ka ïew ka hat ban ïoh dor bha ynda la dep leh ïa ka jingsong kaba janai kaba tip kum ka Food Package ne ban ïoh laisen.
