Mawkyrwat, ‘Naiwieng 04: Ka Mawkyrwat Arm-Wrestling Association (MAWA) ha ryngkat ka jingïatreilang bad ka ophis u District Sport Officer (DSO), South West Khasi Hills District ha ka sngi saitjaiñ jong ka taïew ka 2 tarik u Naiwieng, 2024 ki la ïoh ban pynlong ïa ka lymïakop ïakhun-kti ne ka District Arm-Wrestling Championship 2024 na ka bynta ki kynthei bad shynrang.
Ïa kane ka lympung ïalehkai ïakop ïakhun-kti ‘District Arm-Wrestling Championship 2024’ la pynlong ha Dorbar Hall Mawkyrwat ha kaba u bah Renikton Lyngdoh Tongkhar, MLA jong ka Mawkyrwat Konstitwensi ula long kum u kongsan. Lah ban kdew ruh ba kane ka lympung ïakop ïa khun kti ka dei ruh shibynta na ka bynta ban jied ïa ki ‘rang bad ki ‘thei ïalehkai ban leit mihkhmat ïa ka District sha ka Meghalaya Games ne State Championship ka ban sa long shen ha ki bnai ban sa wan.
Kiba la wan ban ïashimbynta ha kane ka District Arm-Wrestling Championship 2024 ki la long naduh ki samla shynrang bad kynthei ha kaba la phiah ïa ki na ka bynta ki Junior bad ki Senior.
Ha kaba kut jong ka jingïakop, la ïoh ban sam ïa ki khusnam nongjop ha kaba ka Aidahun Lyngdoh ka la ïoh nam jop ha ka kyrdan Women Junior 50kg hapoh bad ka Rosecyca Lyngdoh ha ka 50kg shajrong, ka Lalarisha Kharkharai ha ka Women Youth 50kg shapoh, ka Ditiful Thongni ha ka jingkhia ba 60kg shapoh bad ka Shairilang Mary Wanniang ha ka jingkhia ba 55kg.
Nangta, ki shynrang kaba dei jong ki Junior 55kg la ïoh nam jop da u Samuel Nongsiej, u bah Khrawkupar Marweiñ u jop ha ka 55kg shajrong, na ka bynta ki Men Youth 55kg la ïoh da u Ridaphi Vaichei, na ka bynta ki Men Youth 60kg la ïoh da u Wankordorlang Nongsiej, na ka 65kg la ïoh da u Dakyrmenlang Lyngdoh, bad na ka bynta ka 75kg la ïoh da u Stevefordson Lyngdoh.
Shuh shuh na ka bynta ki Men Senior 55kg la ïoh da u Belnadus Kharjahrin, ha kaba 60kg la rah da u Fredy Wanniang, ha kaba 65kg la ïoh u Rulling Nongsiej, bad ïa kaba 75kg pat la ïoh da u Wanpliebor Wanniang.
Ha kane ka District Arm-Wrestling Champions 2024 kiba ïoh ïa ka nam ‘Champions of Champions’ jong u snem 2024 na ka liang ki kynthei la ïoh da ka kong Shairilang Mary Wanniang bad na ka liang ki shynrang la ïoh u bah Wanplibor Wanniang. Kine kiba ïoh rah ïa ka nam jop kin sa ïoh ban mihkhmat ïa ka District ban leit ïa shimbynta ha ka Meghalaya Games.
