U wan u ksiew dang step u ong ka Mi lah ïap, mynsaw ka kurim ba shah shoh beiñ ha u tnga

Shillong, Ïaïong, 30: Kawei ka longkmie kaba la don kumba 26 snem ka rta kaba shongkha ïa uwei u rangbah uba la tip kyrteng kum u Petrus uba la don kumba 40 snem ka rta ka la mynsaw jur hadien ba ka la shah shoh pynmynsaw ha la jong u kurim.
Kane ka la jia ha kawei ka shnong ha ka thaiñ Upper Shillong, East Khasi Hills District ha ka Lah Sngi u Blei ha ka por kumba 2 baje noh sngi.
Ka kmie jong kane ka longkmie kaba la don mynta hapdeng ka jingshah sumar ha Civil Hospital, Shillong ha ka jingïakren bad u nonglum khubor ka la ïathuh ba ka la ïoh jingtip ïa kane ka jingjia na u khun ksiew uba dang rit uba la leit pyntip ïa kane ka jingjia sha ka ïing jong ka Meiieid kaba don kham hajan ka iing kaba ki shong ki sah.
Halor kane ka jingjia, ka kmie jong kane ka longkmie kaba la mynsaw ka la ujor da ka ejahar sha ki Pulit jong ka Mawngap Police Station da kaba kyrpad ban ai jingïada ïa ka khun na kino kino ki jingjia kiba lah ban jia hadien habud.
Ka Chairperson jong ka Meghalaya State Commission for Women (MSCW) Kong Ïamonlang Syiem tang shu ïoh jingtip halor kane ka jingjia ryngkat bad ki dkhot jong ka Commission ki la leit jngoh ïa ka longkmie ba dang don hapdeng ka jingshah sumar ha Civil Hospital bad ong ruh ba ka Commission kan sa pan kaiphod na ki doktor bad kumjuh ruh na ki Pulit.
“Ngin sa ïarap ïa ine i longkmie bad ngin sa buddien ïa kane ka jingjia na ki doktor bad na ki Pulit,” la ong ka Kong Syiem.
“Ngim pat tip ïa ka jinglong jong u baroh shikatta, kam ju ïathuh. Ka ong ba ka tieng lok. Hynne dang step u wan u ksiew sha ïing nga kylli balei khun phim leit skul, u ong ka Mi lah ïap. Nga lyngngoh bad nga dang mai dang tim balei u kren kumta namarba ngam ïohi ïa ka jingjia mynshi sngi ba nga shong iew,” la ïathuh ka Kmie.
“Ynda nga la phone ka (khun) kren da ka sur ïam. Ka ong mei nga la shah shoh, nga la kdiah lut ka met ka phad,” la ïathuh shuh shuh ka Kmie bad bynrap, “ynda nga leit peit hi dalade nga da jaw ummat. U khyllung u ong ka Mi lah ïap dei namarba ka kmie kam nang kren shuh. U shu ong ba la mih snam ki khmat namarba dei ba la pdung ki khmat.”
Ka la ïathuh ynda ladep kyllan dawai ïa ka khun la pynkit noh sha hospital.
“Kum ïa une u jait briew ym dei ban ïashah. Ki Pulit ne ka Sorkar ki dei ban ïarap lem khamtam ïa ki kynthei. Ym shong shngaiñ shuh ban dang long kumne. …….kane ka long kumba u thmu ban shim wat ïa ka jingim jong ka,” la kren bynniaw ka Kmie.
“Ngi kwah (ba ka aiñ) kan kem noh ïa une u briew uba la long kum u riewthrangsnam ban shu shoh ïa ka kynthei briew, ïa u ksiew uba dang rit uba dang 5 snem ban shu tep im bad ïa ka kmie. Lada ngim kloi ba lap, tip kan jia aiu bad khun bad kmie. Donbok ba dang ieid u Blei ba u ksiew u wan ïathuh ïa nga,” ka la ïathuh shuh shuh ka Kmie da ka jingjaw ummat.
Katba ka kurim ka la kynnoh ba u tnga jong ka u dei uba ju mlien ban ïaid kynthei bad tang ban ïada ïalade u ju shoh ïa la ka tnga.
“Manla ka por ynda u la buaid bad um mon shuh u shu kynroi bad u shu shoh beit ïa nga,” ka la ong.
Haba kylli, ka la ïathuh ba na une u tnga ki la don saw ngut ki khun kiba la khladnoh na ka daw ba ka la khalor na ka daw ba ka shu shah shoh beit ha la u tnga.
“Dang ha u bnai Lber, nga dang shu dep shah puid i khunlung ba dang san bnai. Tang mynta u bnai ruh haduh saw sien san sien nga shah shoh. Ka jingsngap jar jong nga ka long namarba ynda u shoh mynmiet ha ka por buaid, mynstep ynda la pyngngad u la khroh bad kren ieid. Kumta shi kumta,” ka la ïathuh shuh shuh.
Ka la ïathuh ba ka jingmynsaw ka la jur bha na ki bynta jong ki kjat bad ka tyrpeng bad ka khlieh.