Nongpoh, Naitung 17: Uwei na u nonghikai ïa ka Sobjek Geography ha JNV Niangbari, u P.P Sharma mynta ka sngi haba ai jingkren ha ka jingkynmaw burom ïa ka lyngkhuh sngi ïap ba 190 snem u Tirot Sing Syiem, u la ong, “U Tirot Sing Syiem um dei tang u nongïaleh laitluid na ka bynta ka jaid bynriew Khasi bad u dei ruh u nongïaleh laitluid na ka bynta ka ri India”.
U P.P Sharma kum u nonghikai ïa ka sobjek Geography ha JNV Niangbari, u la ong ruh ba ka jylla Meghalaya ka dei kawei na ka jylla kaba pynmih ïa ki riewshlur ba kynthup naduh u Tirot Sing Syiem, u Kiangnongbah, u Patogan Sangma bad kum ka jaid bynriew ki dei ban sngewsarong bad ki dei ban ai ka burom ïa kine ki riewshlur kiba la len lade ïa la ka jingim ban im ka jaid bynriew.
Haba kren ha kane ka sngi, u Sharma u la kham ban khia ruh shaphang u Syiem Tirot Sing Syiem, uba la dei shisha uta u khlawait ka jaid bynriew Khasi ha kaba u la ïa khun pyrshah ïa ki phareng na ri Sepngi bad ka jinglen lade jong u, ka dei ka dawbah ba ngi ioh ïa ka jinglaitluid ym tang ïa ka jaid bynriew Khasi bad ka jinglaitluid ha ka ri India hi baroh kawei.
Shuh shuh, u la ong ruh ka jinglen lade kine ki nongïalam ba shlur na ka jylla Meghalaya ym tang ba ki la ïa khun ne aiti ïa la ka jingim ban ioh kata ka jinglaitluid, hynrei ki long ruh ka jingai mynsiem ïa ki khun samla na ka bynta ka pateng ban sa wan ba kum ki samla ki hap ban ïada ne len lade ïa la ka jaid bynriew, u la bynrap.
