Khliehriat, Risaw, 09: Ki bahaïing hasem jong u Bah Syot Lamurong na ka shnong Mynthing East Jaiñtia Hills District ki la pynpaw ka jingsngewdiaw kaba khraw halor ka jingshah kynnoh ba u Syot Lamurong u donkti ha kaba pynïap ïa u Bah Justin Pakem na ka shnong Lumthari, East Jaiñtia Hills District
Kane ka jingkyntait jong ki bahaïing hasem u Bah Syot Lamurong ka long halor ka jingkynnoh da ki bahaïing hasem jong u Bah Justin Pakem uba la khladnoh ha kaba ïa ka met jong u la lap na kawei ka krem dewïong ba khlem pyndonkam shuh.
Ki la ong ba ka jingshah kynnoh jong u Bah Syot Lamurong ka dei tang ka jingkynnoh ka bym shong nongrim ha kaba la shu kynnoh ha ki lad pathai khubor khlem kano kano ka sakhi ban pynshisha na kino kino ki kynhun tohkit.
“Ngi sngew ban ong ïa baroh ki nongpule bad kiba peit ïa ki khubor ha YouTube ba kim dei ban pdiang ïa ka jingshah kynnoh kumba la kynnoh da ki bahaïing jong u (L) Justin Pakem. Ngi pynshai shuh shuh ba u Syot Lamurong um donkti eiei ruh ha kane ka jingjia ïa u (L) Justin Pakem bad ka jingkynnoh ka dei tang ban pynjah burom ïa u Syot Lamurong bad ïa ngi ki bahaïing hasem. Kane ka jingshah kynnoh ka la bankhia ïa ka jingmut jingpyrkhat jong u Syot bad pynjah burom ïa u,” ong u kyrwoh.
U Bah Syot Lamurong bad ki bahaïing hasem ki la pynpaw ka jingsngewsih ruh halor ka jingkhlad jong u Bah Justine Pakem bad ki la phah ïa u kyrwoh sngewlem sha ki bahaïing hasem bad ki la pynpaw ruh ka jingshaniah ba ka kynhun tohkit kan ym don kano kano ka jingleh shiliangkhmat bad ki la pynpaw ruh ba ki khmihlynti ruh ba ka jingtohkit bad ka jingbishar kan long kaba hok bad kaba khuid kaba katkum ka aiñ.
