U Syiem Maharam u la don ka jingthmu ban ai ka jaka sha ki BSF, ïathuh u EM Development

Shillong Risaw 23: U Executive Member u ba khmih ïa ka tnat Kam Pynroi (Development) jong ka KHADC u Bah Powell Sohkhlet u la ïathuh hapoh ka Dorbar Tlang jong ka Council ba u Syiem ka Hima Maharam u la don ka jingthmu ban ai jaka sha ki BSF ha Sohbajram, Photmula bad dei ba la ïohi ïa kane ba na ka liang ka Executive Committee ka la pan jingshai na u Syiem.
Halor kane u Executive Member ka KHADC u la jubab ïa ka jingkylli ba la wanrah da u MLA/MDC ka Ranikor u Bah Pius Marweiñ halor ki jingthmu u Syiem ban ai jaka sha ki BSF kumba la ïohi ha kine ki por ba la dep kaba la pynpaw ruh ka jingpyrshah da ka seng KSU.
Haba ïadei bad kane u Executive Member u la ïathuh ba hadien ka jingujor ka KSU South West Khasi Hills kaba la ïohpdiang da ka EC ha ka 29.9.25 ka la pan jingshai na u Syiem bad na ka liang jong u ruh u la phah da ka jingthoh ban ïathuh ba ki shipai BSF kim treh shuh ban shim ïa ka jaka.
U EM u la ïathuh ruh ba katkum ki kyndon ym lah ban ai jaka khlem da ïoh ka jingmynjur jong ka KHADC.
Haba shimbynta lang ha kane ka jingkylli, u MDC ka Laban-Mawprem u Bah Ricky Shullai u la ïathuh ba hapoh ka constituency jong u, ki don ki Rangbah Shnong kiba leh katba mon, don kiba ïaid lait ïa ki kyndon bad dei halor kane ba don ki jaka ba la shu shah kam ei ha ka Sorkar.
Haba pynpaw ïa kane u EM u la ïathuh ba katkum ka Land Act, 2021, ki raid, ki Hima, ki Rangbah Shnong ne Dorbar Shnong ki hap bud ïa kane ka Act, kim lah ban ïaid lait khlem da mynjur ka KHADC ha kaba ïadei bad ki kam die ne aiti ïa ki jaka sha ki shnat treikam ka sorkar jylla ne wat sha ka sorkar pdeng.