Shillong, Risaw, 08: Ki riew rangbah jong ka Wahlang Khyndai Kyntoit kiba dei ki khun ki hajar jong ka Hima Nongspung ha ka sngi Baar ki la mih shakhmat ban pynrem ïa ka jingleh bym suidñiew jong u Syiem ka Hima Nongspung ba la shah sospon u Pa’iem Petrick Syiemïong.
Ka jingbym ai Sanad jong u Syiem ka Hima Nongspung u Pa’iem Petrick Syiemiong ïa u Lyngdoh ba la jied thymmai jong ka Wahlang Khyndai Kyntoit u Bah Storian War ka la pynlong ïa ka Khasi Hills Autonomous District Council (KHADC) ban tuklar ïa kane ka kam da kaba pynhiar khet ïa u Paiem Petrick Syiemïong namar ka jingbym kohnguh ïa ka hukum ba la pynmih da ka Executive Committee jong ka Council.
U Bah Swonding Khasaiñ bad u Bah Wonstoning Rani ha ka jingïakren bad ki lad pathai khubor ki la ong ba ka kam Lyngdoh ha Wahlang Khyndai Kyntoit ka dei kaba la don naduh u snem 1908 bad ïa kane ka riti ka dustur la pynneh pynsah haduh mynta mynne.
Ki la kynnoh ruh ba ka jingkyntait jong u Syiem ba la shah sospon ban ai Sanad ïa u Bah Storian War ka long namarba u Syiem u la pynksan ba ha Wahlang Khyndai Kyntoit la thung beit tang ïa u Sordar.
“Ngi la leit pan Sanad (na u Syiem) katkum ka hukum jong ka District Council ba la pynmih ha ka 14 tarik, Jylliew, 2023 bad bthah ïa u Pa’iem Petrick ban ai Sanad ïa u Bah Storian War kum u Lyngdoh jong ka Wahlang Khyndai Kyntoit. Ka District Council ka la leh ïa kaba dei katkum ka riti ka dustur jong ka Wahlang Khyndai Kyntoit. Ngi pyrshah jur ïa ka jingkren jong u Pa’iem Petrick uba ong ba ym ju don Lyngdoh ha Wahlang Khyndai Kyntoit,” ong u Bah Swonding.
Katkum ka jingïathuh jong kine ki rangbah, ka Wahlang Khyndai Kyntoit ka la don ïa u Lyngdoh naduh u snem 1908.
“Ngi kyntu ruh ïa u Acting Chief ba mynta jong ka Hima Nongspung u Bah Kyntiewborlang Syiemlieh ba un ai noh ïa ka Sanad sha u Lyngdoh ba mynta, u Bah Storian War,” la ong u Bah Swonding.
