U soh Kynphor na Nongnam u long u ba bang bha, ong u MLA ha jingplie ïa ka ‘Ïew 3 Shnong’

Mawkyrwat, K’Lyngkot 18 : Kum ka lad ban kyntiew ïa ki nongrep khamtam eh ban pynïaid ïew ïa ki mar ki mata, ka Synjuk Lai Shnong ba kynthup ïa ka Nongman, Mawbri bad Lumpyngngad ha ka sngi jong ka taïew ka 17 tarik u Kyllalyngkot, 2026 ki la ïoh ban plie paidbah ïa ka jaka ban ïa-die ïa-thied ïa ki mar rep kaba ki la buh kyrteng ka Ïew 3 Shnong ha kaba kane ka kan kdup lang ïa ki 5 tylli ki Shnong kata ka Nongnam, Mawbri, ka Lumpyngngad, Mawkhyrwang bad ka Mawtangden.
U kongsan ha kane ka sngi u dei u bah Renikton Lyngdoh Tongkhar uba dei u MLA ka Mawkyrwat Constituency ha ryngkat ka jingdonlang u bah Commandar Shangpliang uba dei u President ka Hill Farmers Union Central Body kum u Symbud Kongsan. Ha kane ka sngi kum ka dak jong ka jingthmu ban pyntyllun shuh shuh ïa ki kam ba ïa dei bad kane ka Ïew 3 Shnong, u bah Risstar Shylla uba bat kum u Secretary ka Synjuk 3 Shnong u la aiti ïa ka dorkhas ha u bah Renikton Lyngdoh Tongkhar, MLA ka Mawkyrwat Constituency.
Haba kren ha ka jingïalang, u bah Renikton Lyngdoh Tongkhar ula pynpaw ka jingkhublei na ka bynta ki rangbah jong ka Synjuk 3 Shnong kiba la sdang ban plie ka lad ban kyntiew ïa ka kam rep kam riang lyngba ka jingïadie ïathied ïa ki mar ki mata ha kaba ki la ïoh ban plie paidbah ïa ka ïew ba ki la jer kyrteng ka ‘Ïew 3 Shnong’ ha kaba kane ka ïew kan kdup lang ïa ki 5 tylli ki Shnong kata ka Nongnam, Mawbri, ka Lumpyngngad, Mawkhyrwang bad ka Mawtangden.
“Kyrmen ba da kane jingdon jong kane ka ïew, kan long ka jingïarap ïa ki nongrep ba kin lah ban pynïaid ïew ïa ki mar ha kaba ki nongkhaiï na kylleng ki jaka kin sa wan ban thied ïa ki mar ki mata”, ong u bah Renikton Lyngdoh Tongkhar.
Haba kren shaphang uwei soh, ïa uba ula ïoh mat bad uba bang, u bah Renikton Lyngdoh Tongkhar ula ai ka jingïaroh ba u soh kynphor ba u, u la ïoh ban mat ha kylleng ki jaka, u la ong ba dei u soh kynphor na Shnong Nongnam u long uba bang bad uba thiang. Kumta ula kyntu bad ai mynsiem na ka bynta ki nongrep ba kin ïa rep kham bun bad lada ki kwah ban kyntiew bad pynïaid ïew ruh ïa une u soh kynphor hadien ha bud, na ka liang jong u un sa ai ka-kti ka-mon ka-kti ka-diang ha kaba pynïaid ïew ïa u bad wat ban pyni-thuh ha ka pyrthei shaphang ka jingbang jong une u soh kynphor.
Ïa ka jingïalang la pynïaid da u bah B. Lyngkhoi uba dei u Myntri Shnong Mawbri, ka jingkren pdiang na u bah Stibinstar Shylla, Myntri Shnong Nongnam, ka jingkren maitphang na u bah Kinglang Shylla u Myntri Shnong Lumpyngngad bad jingkren khublei na u bah Kambellan Shylla uba dei u President ka Synjuk 3 Shnong.