Mawkywat, Jymmang 27: Ka Lok Janshakti Party (LJP) ha ka 14 tarik u Jymmang, 2022 ha Mawkyrwat ka la pynlong ïa ka jingïalang ban lum ban lang ïa ki nongkyrshan jong ka party ha ryngkat ki dkhot jong ka ban ïa pyrkhat ban pynkhlaiñ ïa ki jingtreikam bad la pynlong ïa kane ha Circuit House Mawkyrwat, South West Khasi Hills District.
Ka daw kaba la pynlong na ka State President jong ka (R) Lok Janshakti Party (LJP), Meghalaya ban hiar ban pynlong ka jingïalang ba kyrpang ka long hadien ba ka la dep ban pynduh shipor ïa ka District Committee jong ka South West Khasi Hills District namar ki katto katne ki daw jong ka jingbym lah shuh ban treikam ki nongkitkam kiba rim.
Ha kane ka jingïalang ka la don ka jingïatai kaba sani bha bad ka jingïa jingmut kumno ban khie im biang ïa kane ka party, kumta hadien katto katne por ba la dep ban ïa kren la rai ban pynkhie im biang ïa ka District Committee jong ka South West Khasi Hills District Committee lem bad ki 19 ki nongkitkam ha kaba ïa kane ka komiti yn lam khmat da u bah Shongdorlang Nongsiej u ba long ha ka kajuh ka por kum u President ba thymmai jong ka Lok Janshakti Party (LJP).
Halor kane ka bynta, na ka liang ka State President ka la ai ka jingkitbok kitrwiang na ka bynta kane ka komiti kaba thymmai ba kan sa lah ban pyntyllun ïa kiba bun ki kam ha ryngkat da ka jingïatreilang lem bad ka jingïasngewthuh jingmut ha kiba bun ki bynta.
Ki nongkitkam ba thymmai jong ka South West Khasi Hills District Committee, Lok Janshakti Party (LJP) ki long President u Shongdorlang Nongsiej, Vice President u Silvestar Buhphang, Chief General Secretary u Naphang Nongsiej, General Secretary u Reynddson Lyngdoh, Secretary kong Kialanty Marweiñ, Assistant Secretary u Nongjop Thongni, Treasurer u Khrawbor Syiemlieh bad kynthup de ïa ki 12 ki dkhot.
Kane ka long katkum ka tyllong khubor na u Dinesh Kumar Gupta, Chief General Secretary, (R) LJP, Meghalaya, Shillong.
