U Shidorki Dkhar um dei na ka shnong Thangraiñ, dawa weng ïa ka Record ba kren u HM hapoh ïing Dorbar

Jowai, Nailur 13: Ki nongïalam shnong ka Dorbar Shnong Thangraiñ, Elaka Shiliangmyntang, West Jaiñtia Hills hapoh ka jingïalam jong u Waheh Shnong ma Pyrkhatbhami Sungoh, ha ryngkat ki samla shnong bad ka KSU Thangraiñ Unit ba la ïalam da u samla Hababiangki Biam, President, kila wan ban pynshai paidbah mynta ka sngi (13/9/2022) halor ka jingmih kyrteng khlem nongrim jong ka shnong Thangraiñ ha ki ladpathai khubor katkum ka jingkren jong u Home Minister ma Lahkmen Rymbui hapoh ka ïing Dorbar thawaiñ ka jylla.
Na ka liang jong ka Dorbar Shnong Thangraiñ bad kine ki nongïalam seng kila pynpaw ïa ka jingsngewsih bad pynrem jur halor kane ka jingpynmih kyrteng kulmar jong u Home Minister ïa ka shnong Thangraiñ hapoh ka ïing Dorbar Thawaiñ ka jylla (Assembly) ba u ong ba u Shidorki Dkhar uwei na ki saw ngut ki koidi bala shah bom ïap ha ki paidbah u dei na ka shnong Thangraiñ.
Kane ka jingpaw kyrteng jong ka shnong Thangraiñ hapoh ïing Dorbar bad sha ki lad pathai khubor kala pynjah burom shi katdei eh ïa ka shnong la ong u Waheh Shnong ma Pyrkhatbhami.
Kumta na ka liang kitei ki nongïalam shnong kila buh ka jingkyrpad ïa ka Sorkar bad ruh ïa u Nongmihkhmat ka thaiñ ba un sngewbha ban un ïarap pynshai lem hapoh ka ïing Dorbar ba u (L) Shidorki Dkhar um dei satia na ka shnong Thangraiñ kumba la kynnoh bad ha ka juh ka por kila dawa ba dei ban weng ne pynduh noh ïa ka Record ha ka Bui sorkar bala shim halor ka jingkren jong u Home Minister hapoh ka ïing Dorbar Thawaiñ.
Kumta sa shisien ka Dorbar Shnong Thangraiñ ka buh ka jingkyntu ïa baroh ki paidbah nongshong shnong ka Jylla ba kim dei satia ban pdiang ïa kane ka jingïalambakla jong u Home Minister bad kum ka shnong ka pynshai ba kam don jingtip ne jingithuh ei ei ïa utei u (L) Shidorki Dkhar bad um don jingïadei eiei bad ka shnong Thangraiñ.
Kila kyrpad ruh na u MLA ka thaiñ na ka 4 Mowkaiaw Constituency ba un shimkhia ïa kane ban ïasaid ïa kane ka jingkynthoh ïa ka shnong Thangraiñ ka hapoh ka ïing Dorbar Thawaiñ.