U Sardar Patel u la noh synniang shibun bha ban pynlong ïa ka ri kaba khlaiñ: Vijayashankar

Shillong, Naiwieng 19: Ka Raj Bhavan, Shillong ha ka sngi baar ka la rakhe ïa ka Rashtriya Ekta Diwas (National Unity Day) ha Durbar Hall, ha kaba kynmaw burom ïa ka sngikha jong u Sardar Vallabhbhai Patel.
Haba kren ha ka jingïalang, u Lat ka jylla Meghalaya, u C.H. Vijayashankar u la pynpaw ka jingïaroh ïa ki pulit ka Meghalaya, ki BSF, ki CRPF, ki nonghikai bad ki samla pule ba ki la shimbynta ha kane ka prokram. Ha ka jingkren lamphang u Lat u la pynkynmaw ïa ki kam baradbah jong u Sardar Patel, da kaba ong ba u dei u “Iron Man of India” uba la buh ïa ka nongrim na ka bynta ka jingïalong kawei hapoh ka ri, ka jingneh bad ka jingkiew shaphrang jong ka ri.
Haba phai sha ki lynnong naduh ki por ba u dang leit skul, u Lat u la pynpaw ïa ka jingdonkam ban long kiba peitngor ha ka ban ai ka jingïada ïa ka ri. U la kdew ba ki jingma jong ka jingïalong kawei kaba lah ban mih ym tang na ki bor ba nabar hynrei napoh ka ri, kumta u la kyntu ïa ki nongshong shnong ban long kiba phikir bad ban long kiba ïada ïa ka ri na ki jingshah thombor kiba nabar. “Kadei kamram ban pynneh ïa ka jingïalong kawei, ka jingïalong shipara jong ka Bharat Mata,” u la ong.
U lat u la pynkynmaw ïa ka kam ba la leh da u Sardar Patel halor ki jylla ba la synshar da ki syiem bad ka jingpynwandur ïa ka India kaba mynta. U la banjur ruh halor ka jingnoh synniang u Patel ban thaw ïa ka rukom treikam kaba khlaiñ lyngba ka jingthaw ïa ka All India Services-IAS, IPS bad IFS-da kaba ong ba kidei ki “steel frame of India” kaba bteng ban pynneh ïa ka rukom treikam kaba bha na ka bynta ka ri.
U Vijayashankar u la kdew ba hapoh ka jingïalam jong u Myntri Rangbahduh ka ri u Narendra Modi, la rakhe ïa ka National Unity Day ha kylleng ka ri ban pynskhem ïa ka “Ek Bharat, Shreshtha Bharat.”
Haba kren shaphang ka Meghalaya, u la ïaroh ïa ka jingriewspah jong ka jylla halor ka kolshor bad ka jingïaineh ban don hapdeng ka suk ka saiñ, ka jingïasngewthuh jingmut. U la banjur ba ka jingïalong kawei ka long kaba kongsan bad kaba donkam ruh ka jingïatreilang na ka bynta ki jingïaid shaphrang jong ki kam.
U Lat u la pynkut da kaba kyntu ïa ki nongshong shnong ban long kiba neh ban tei ïa ka India kaba khlaiñ da kaba pynpaw ka jingkyrmen ba ka mynsiem jong ka jingïalong kawei ka ban ïalam ïa ka Meghalaya bad ka ri na ka bynta ka jingsuk bad ka lawei kaba phyrnai.