U samla Pherdonnam Rngaid kum u kyrtong MDC ka Congress na Langrin Constituency

Mawkyrwat, Nohprah 21: Ka Indian National Congress (INC) ha ka sngi saitjaiñ jong ka taïew ka la ïoh ban pynbna ïa u kyrtong u ban sa ïa khun ha ka Election MDC jong u snem ban wan kaba dei napoh jong ka 26 – Langrin Constituency ha kaba u samla Pherdonnam Rngaid un long u kyrtong.
Katkum ka jingpynbna na u bah Kynpham V. Kharlyngdoh, President ka District Congress Committee (DCC) lyngba ka jingkren ha ki lad pathai khubor u la ïathuh ba ka jingpynmih ne phah ïa ka kyrteng jong u samla Pherdonnam Rngaid ka long hadien ka jingïatai ba sani bha ryngkat bad ka Ranikor Congress Committee (RCC) bad da kawei ka sur ki la ïa rai ban pynïeng bad phah tang kawei ka kyrteng jong u.
Lah ban kdew ba u samla Pherdonnam Rngaid u dei na ka Shnong Nongnah-Nongkdait, South West Khasi Hills District uba dei ruh u samla uba ju don ha syndah jong u MLA barim jong ka Ranikor Constituency, u Martin M Danggo bad uba bat ruh kum u Manager jong ka Nangkiew Irat Sports Club.
Shuh shuh na ka liang u President ka District Congress Committee (DCC) u la pynshai shuh shuh ba katkum ka rai jong ka komiti kim shym la don ka jingartatien ei ei ruh em namar da ka jingïarai hi ki la mynjur ban phah beit tang kawei ka kyrteng kumba ka la long hapoh ka Mawkyrwat Constituency ba ki la pynmih ïa ka kyrteng jong u bah Medalsing Lyngdoh. “Ha ka jingïaleh hi kum ki nongïalam ki don ka jingkyrmen ba ka Congress ka don ka jingkyrmen ha kane ka kynti ba mynta namar ha ka jingïakhun ym don mano mano ba kwah ban shah rem”, ong u President ka District Congress Committee (DCC).
Ha ka jingïakren bad u samla Pherdonnam Rngaid u kyrtong MDC, u la pynpaw ka jingkhublei na ka bynta ki nongïalam baroh kiba la buh ne phah ïa ka kyrteng jong u ba un long u kyrtong ha kane ka MDC Election 2025. Ym tang kata, u la pynpaw ruh ba mynta ka jingpynkhreh jong u ka la ïaid shakhmat namar u la hap ban mih sha madan ban tyrwa khamtam eh ban pan ka jingkyrshan na ki paidbah jong ka Langrin Constituency bad u la pynpaw ruh ba ka jingkwah jong u ka long ba lada u jop un leh ïa kiei kiei ki kam kiba bah na ka bynta ki jingdonkam jong u paidbah.
“Lada nga poi sha ka thong jong ka jingjop nga shakri ïa ka constituency katkum ka jinglah jong nga namar nga ïohi ba ka Langrin Constituency ka don shibun ki jingduna”, ong u Pherdonnam Rngaid. “Haba thrang ban shakri ïa ki paidbah dei ban don shwa ïa ka jingmut kaba khuid khnang ba u paidbah un shaniah bad lada don lypa ki dak sniew ka jingkylli ha u paidbah ruh ka bun”, jubab u Pherdonnam Rngaid haba kylli ïa ka jingkylli kaba ïa syrïem bad ka jingkren jong ka Voice of the People Party ne VPP halor ka jingkhuid ha ka saiñ hima sima.